Demontre Lespri Pionye
1. Ki mannyer ou pou dekrir lespri pionye?
1 Ki swa zot pe servi konman pionye oubyen non, tou proklanmater Rwayonm i kapab demontre lespri pionye. Zot vreman enterese pour obeir sa lord pour prese e fer disip. (Mat. 28:19, 20; Akt 18:5) Zot enterese avek dimoun e fer bann sakrifis pour kapab akonpli zot minister. (Mat. 9:36; Akt 20:24) Bann serviter Zeova i pare pour fer tou sa ki zot kapab pour ed lezot aprann laverite. (1 Kor. 9:19-23) Annou vwar legzanp en dimoun ki ti demontre en tel leta lespri. Sa i Filip ki ti en predikater levanzil.
2. Ki mannyer bann ansyen ek asistan ministeryel i kapab imit devouman Filip dan predikasyon?
2 Prese e ansennyen: Filip ti annan bann responsabilite tre enportan dan kongregasyon premye syek. (Akt 6:1-6) Pourtan, i ti avan tou en predikater devoue sa bon nouvel. (Akt 8:40) Alor ozordi, ler bann ansyen ek asistan ministeryel pe akonpli zot bann responsabilite, zot kapab demontre lespri pionye par diriz predikasyon avek lantouzyasm. Pa sa i motiv kongregasyon!—Rom. 12:11.
3. Ki mannyer nou kapab demontre lespri pionye ler nou rankontre leprev?
3 Apre lanmor Etyenn, en gran persekisyon ti fer bokou konfizyon dan lavi bann disip. Me Filip ti kontinyen prese, e i ti zwe en rol enportan pour konmans sa travay parmi bann Samariten. (Akt 8:1, 4-6, 12, 14-17) Nou kapab imit son legzanp par kontinyen pres sa bon nouvel ler nou rankontre leprev e par pres avek tou dimoun ki nou zwenn san fer preferans.—Zan 4:9.
4. Ki legzanp Filip in kite konman en ansennyan?
4 Abilite Filip konman en ansennyan Parol Bondye i kapab ganny trouve dan sa resi kot sa Etyopyen ti ganny konverti. (Akt 8:26-38) Devlop abilite pour servi Labib e pour ‘rezonn lo Lekritir’ i en lot fason ki nou demontre lespri pionye. (Akt 17:2, 3) Parey Filip, nou partaz sa bon nouvel nenport landrwa kot nou kapab trouv dimoun e dan tou moman.
5. Kwa ki kapab ed bann paran Kretyen pour devlop lespri pionye dan zot zanfan?
5 Fanmiy ek Kongregasyon: Latitid ek legzanp Filip ti san dout fer en lefe pozitif lo son bann fiy. (Akt 21:9) Pareyman, bann paran Kretyen ki konsantre lo bann lentere Rwayonm i ankouraz zot zanfan pour fer parey. Menm si zot fatige alafen lasemenn, en paran ki pres aktivman avek lezot i kapab fer en gran lefe lo leker en zanfan ki pou reste la pour toultan.—Prov. 22:6.
6. Ki mannyer nou kapab montre lapresyasyon pour bann pionye dan nou kongregasyon?
6 Filip ti ofer lospitalite avek Pol ek Lik, de Kretyen devoue ki ti pe travay dir dan servis Zeova. (Akt 21:8, 10) Ki mannyer nou kapab montre lapresyasyon ek sipor pour bann ki devoue ozordi? Petet nou kapab travay avek bann pionye pour en bomaten ouswa en apremidi zour ki napa bokou dimoun dan randevou predikasyon. (Fili. 2:4) Nou osi kapab envit zot kot nou pour en bon lasosyasyon. Nenport ki sitiasyon nou ladan, annou fer zefor pour demontre lespri pionye.