Nou devret respekte Lotorite Zeova

Avek kwa ou asosye sa bann non ansyen, Kora, Datann, ek Abiram? Rebelyon! Kont kwa? Lotorite Bondye. Dan Nonm sapit 16 i rakont an detay sa ki zot ti fer, e dan sa lartik “Soumet Fidelman avek Lotorite Divin” dan Latour Veyer le 1 Out 2002 i donn en apersi sa sitiasyon. Ou pou vwar li itil pour lir sa lenformasyon e apre get sa video Respect Jehovah’s Authority pour vwar e reflesir lo sa ki zot ti fer. Ou pou vwar sa konfli ki ti devlope ant bann garson fidel Kora ek zot papa rebel, ki ti an konfrontasyon avek Souvren liniver. (Nom. 26:9-11) Sa dram ki demontre ki ti vreman arive i devret motiv nou tou pour devlop plis fidelite anver Zeova.

Anmezir ou get sa video, rod levidans ki montre ki Kora ek son bann konpanyon rebel pa ti kapab reste fidel dan sis laspe enportan: (1) Ki mannyer zot ti mank respe pour lotorite Bondye? (2) Ki mannyer zot ti les lorgey, lanbisyon ek zalouzi afekte zot? (3) Ki mannyer zot ti konsantre lo lenperfeksyon bann ki Zeova ti’n apwente? (4) Ki latitid konplent ki zot ti’n devlope? (5) Akoz zot pa ti satisfe avek zot privilez? (6) Ki mannyer zot ti les zot zanmi ek fanmiy vin avan ki zot fidelite avek Bondye?

Vwar ki mannyer leson ki nou aprann dan sa dram Labib i aplik avek nou pwennvi personnel lo lotorite Bondye ozordi: (1) Ki mannyer nou devret azir anver desizyon bann ansyen dan kongregasyon, e akoz? (2) Ki mannyer nou kapab sirmont okenn move lentansyon dan nou? (3) Ki mannyer nou devret azir anver lenperfeksyon bann ki’n ganny apwente pour dirize? (4) Ki nou devret fer si en leta lespri konplent i konmans devlope dan nou leker? (5) Ki mannyer nou devret santi konsernan okenn privilez ki nou’n gannyen? (6) Lekel ki pa devret zanmen vin avan ki nou fidelite avek Bondye, e kan ki sa i kapab vin en tes difisil pour nou?

Apre ki sa lenformasyon in ganny diskite dan kongregasyon, akoz ou pa get ankor sa video? Les li fer plis lefe lo ou konsernan bann rezon akoz nou devret toultan respekte lotorite Zeova!—Ps. 18:25; 37:28.