Kontinyen gard antet ki Letan i kourt!
1 Zezi ti konnen ki sa letan ki i ti annan pour akonpli travay son Papa lo later ti limite. (Zan 9:4) Alor, ler i ti fer son predikasyon i ti gard antet ki letan i kourt, e i ti form son bann disip pour fer parey. (Lik 4:42-44; 8:1; 10:2-4) I ti met bann keksoz materyel ki ti kapab fer li konfortab dan dezyenm plas. (Mat. 8:20) Alor, i ti kapab fini sa travay ki Zeova ti’n donn li pour fer.—Zan 17:4.
2 Letan i limite: Letan pour pres sa bon nouvel “partou dan lemonn” i osi limite. (Mat. 24:14) Profesi Labib i montre ki depi byen lontan nou’n ariv dan letan lafen. Byento “bann ki pa konn Bondye ek bann ki pa obei levanzil ki konsern nou Senyer Zezi . . . pou ganny konman pinisyon destriksyon eternel.” (2 Tesa. 1:6-9) Sa zizman pou ariv en sel kou an gran. (Lik 21:34, 35; 1 Tesa. 5:2, 3) Bann dimoun i bezwen konn sitiasyon danzere ki zot ladan. I nou responsabilite pour ed zot rod faver Zeova pandan ki i ankor annan letan.—Tsef. 2:2, 3.
3 Fer tou sa ki nou kapab: Vi ki bann serviter Bondye i rekonnet ki “letan i kourt,” zot donn priyorite travay predikasyon. (1 Kor. 7:29-31; Mat. 6:33) Serten in volonterman rezet bann loportinite finansyel ouswa lezot lentere personnel pour ogmant zot partisipasyon dan predikasyon. (Mark 10:29, 30) Lezot i kontinyen “montre touzour plis lentere dan travay Senyer” menm si zot kontinyen rankontre bann difikilte. (1 Kor. 15:58) Bokou zot in anons sa bon nouvel piblikman pour plizyer dizenn lannen avek en konviksyon ferm. (Ebr. 10:23) Zeova i apresye bokou tou sa bann sakrifis ki’n ganny fer pour siport lentere Rwayonm.—Ebr. 6:10.
4 Konsantre nou lavi lo ladorasyon Zeova, ki enkli travay predikasyon, i ed nou pour gard antet zour Zeova. I anpes nou ganny distrer par lemonn Satan e i fortifye nou determinasyon pour gard en bon kondwit. (2 Pyer 3:11-14) Anfet, akonpli nou minister par gard antet ki letan i kourt i kapab sov nou lavi ek lavi bann ki ekout nou.—1 Tim. 4:16.