Persiste dan Predikasyon
1 Nou pe viv dan letan difisil. Bann konfli sivil ek bann lager etnik, dezas natirel, ek lezot levennman sokan i partou. Plis ki zanmen oparavan, imen i bezwen antann bon nouvel. Me bokou dimoun napa lentere dan keksoz spirityel. Dan serten landrwa, i difisil pour vwar bann dimoun kot zot lakour. I menm pli difisil pour vwar bann dimoun ki pou ekout nou oubyen ki anvi etidye Labib. Kantmenm sa, i tre enportan ki nou persiste pour pres sa bon nouvel konsernan Rwayonm Bondye ki’n ganny etabli.—Mat. 24:14.
2 Lanmour pour Dimoun: Nou predikasyon i atir latansyon lo lanmour ki Zeova i annan pour dimoun. “I pa oule ki personn i ganny detri, me ki tou dimoun i arive repanti.” (2 Pyer 3:9; Ezek. 33:11) Alor parey Zezi ti dir, Zeova in donn lord ki “avan, Bonn Nouvel i bezwen ganny anonse avek tou bann nasyon.” (Nou ki’n met an italik; Mark 13:10) Bondye i demann bann dimoun pour tourn ver li e sov sa zizman lo lemonn Satan ki pe vini. (Yoel 2:28, 29, 32; Tsef. 2:2, 3) Pa nou apresye ki Zeova in donn nou sa loportinite?—1 Tim. 1:12, 13.
3 Rapor mondyal i montre ki pandan lannen servis 2004, en mwayenn 6,085,387 letid Labib ti ganny fer sak mwan, e en mwayenn apepre 5,000 nouvo disip ti ganny batize sak semenn! Se gras a benediksyon Zeova ek persistans e osi zefor bann proklanmater pour koz avek tou dimoun dan zot teritwar ki ti fer ki serten parmi zot ti batize. Sa in anmenn bokou lazwa dan bann kongregasyon, e i en gran privilez pour travay ansanm avek Bondye dan sa travay ki sov lavi!—1 Kor. 3:5, 6, 9.
4 Loue Non Bondye: Nou persiste dan predikasyon pour loue Zeova piblikman e pour glorifye son non devan tou limanite. (Ebr. 13:15) Satan in tronp “lemonn antye” par fer bann dimoun krwar ki Bondye pa kapab rezourd bann problenm imen, ki i pa enterese avek soufrans imen, oubyen ki i senpleman pa egziste. (Rev. 12:9) Par nou predikasyon, nou defann laverite konsernan nou Papa merveye ki dan lesyel. Annou kontinyen loue son non konmela menm e pour touzour.—Ps. 145:1, 2.