Wityenm Parti—Kondwir bann Letid Labib ki progrese
Diriz Etidyan ver Lorganizasyon
1. Akoz i itil pour partaz en pwen lo lorganizasyon Zeova dan letid sak semenn?
1 Nou bi ler nou kondwir bann letid Labib i pa zis pour donn bann lansennyman me osi pour ed bann etidyan form parti kongregasyon Kretyen. (Zeka. 8:23) Sa brosir Les Témoins de Jéhovah: Qui sont-ils? Quelles sont leurs croyances? i kapab ed nou fer sa. Kit en kopi avek bann nouvo etidyan Labib, e ankouraz zot pour lir li. Deplis, pran detrwa minit sak semenn dan letid pour partaz en pwen lo lorganizasyon Zeova.
2. Konman ou kapab ankouraz bann etidyan Labib pour asiste renyon?
2 Bann Renyon: Fason prensipal ki fer bann etidyan Labib apresye lorganizasyon Bondye i ler zot asosye avek nou dan bann renyon. (1 Kor. 14:24, 25) Alors, ou kapab fer zot konmans familye avek bann renyon par eksplik zot sa senk renyon ki ganny fer sak semenn. Eksplik zot en renyon alafwa. Mansyonn tit prosenn diskour piblik. Montre zot lenformasyon ki pou ganny egzaminen dan Letid Latour Veyer ek Letid Liv Kongregasyon. Eksplik zot Lekol Minister Teokratik ek Renyon Servis. Ler ou annan en partisipasyon dan lekol, petet ou kapab egzers li avek zot. Partaz bann zoli pwen ki’n ganny prezante dan bann renyon. Servi bann portre dan nou bann piblikasyon pour ed zot esey vwar dan zot lespri sa ki pase dan renyon. Envit zot pour asiste renyon depi premye letid.
3. Ki laspe lorganizasyon nou kapab diskite?
3 Ler Memoryal, bann lasanble, ek vizit sirveyan rezyonal pe aprose, pran enn de minit pour eksplik e ogmant lantouzyasm pour sa bann laranzman. Ptit-a-pti reponn bann kestyon tel parey: Akoz nou apel Temwen Zeova? Akoz nou apel nou landrwa renyon konman Lasal Rwayonm? Ki responsabilite bann ansyen ek asistan ministeryel? Ki mannyer travay predikasyon ek teritwar i ganny organize? Ki mannyer nou bann piblikasyon i ganny prodwir? Ki mannyer lorganizasyon i ganny finanse? Ki rol biro brans ek Konsey Direkter i annan pour sirvey sa travay?
4, 5. Konman nou bann video i kapab ogmant lapresyasyon pour lorganizasyon?
4 Bann Video: En lot fason ki bann etidyan Labib i kapab vwar lorganizasyon merveye Zeova i par mwayen nou bann video. Sa bann video i kapab anmenn sa bann etidyan Jusqu’aux extrémités de la terre, fer zot vin familye avek Toute la communauté de nos frères, e montre zot konman nou Unis grâce à l’enseignement divin. En madanm ki ti resevwar nou bann magazin ek lezot piblikasyon pour senk an ti plere ler i ti get sa video Les Témoins de Jéhovah: un nom, une organisation. I ti’n met son konfyans dan bann Temwen ki vizit li, me apre ki i ti’n get sa video, i ti santi ki i pou kapab met son konfyans dan sa lorganizasyon osi. I ti konmans etidye, e son semenn answit i ti konmans asiste bann renyon dan Lasal Rwayonm.
5 Par pran enn de minit sak semenn avek nou bann etidyan e servi bann zouti ki’n ganny fourni, nou kapab ptit-a-pti diriz bann etidyan Labib ver sa sel lorganizasyon ki Zeova pe servi ozordi.