Progranm Lafanmiy—Teks pour Lazournen
1 Bann paran ki annan lanmour i fer bokou zefor toulezour pour donn zot zanfan bon manze. I pli enportan pour donn zot nouritir spirityel sorti dan Parol Bondye. (Mat. 4:4) En fason ou kapab ed ou zanfan devlop en bon lapeti spirityel pour “grandi e ganny sove,” i ler ou pran letan sak zour pour egzamin teks pour lazournen ek komanter an fanmiy. (1 Pyer 2:2) Kan ou kapab enkli li dan ou progranm lafanmiy?
2 Pandan ler manze: Konmans ou lazournen avek diskisyon teks i kapab ed ou fanmiy pour gard Zeova antet pandan lazournen. (Ps. 16:8) En manman ti deside pour lir e diskit teks ek komanter avek son garson pandan ki i ti pran son pti dezennen e pour fer en lapriyer avek li avan i ti al lekol. Sa ti fortifye li pour pran en pozisyon ferm ler i ti ganny demande pour partisip dan bann aktivite patriyotik, pour reziste bann tantasyon imoral, e avek kouraz donn en temwannyaz son bann kanmarad ek ansennyan. Menm si i ti sel Temwen kot sa lekol, i pa ti zanmen santi li tousel.
3 Si i pa fasil pour diskit teks dan bomaten, ou kapab egzamin li an fanmiy plitar dan lazournen, petet pandan repa aswar. Serten i rakont bann leksperyans predikasyon e bann pwen ki zot in kontan dan zot lektir Labib personnel. Bokou i rapel avek lapresyasyon sa letan pandan repa aswar konman bann moman pli gou ki zot ti pas ansanm an fanmiy.
4 Aswar: Pour serten fanmiy, pli bon moman pour egzamin teks pour lazournen i zis avan al dormi. Sa i kapab osi en bon moman pour priy ansanm. Anmezir ki ou zanfan i tann ou koz lo Zeova e priy li toulezour, Zeova i vin vreman reel pour zot.
5 Fotespere Zeova i beni ou bann zefor pour fer antre laverite dan ou zanfan ler ou byen servi Egzamin Labib sak Zour.