Bann Sef Fanmiy—Gard en Progranm spirityel regilye
1 Kantmenm i ti viv bokou letan an Babilonn, en lavil ranpli avek idolatri ek koripsyon, Danyel ti renonmen pour servi Zeova avek konsistans. (Dan. 6:16, 20) Ki mannyer i ti gard son spirityalite? Resi Labib i endike ki i ti annan en progranm regilye pour fer son bann aktivite ki ti relye avek vre ladorasyon. Par egzanp, i ti abitye priy trwa fwa par zour dan son lasanm. (Dan. 6:10) San dout, i ti osi etablir en progranm fiks pour lezot aktivite spirityel, parey lir Lalwa. An konsekans, ler i ti ganny konfronte avek en leprev ki ti kapab kout son lavi, Danyel ti reste ferm dan son devosyon pour Zeova, e dan en fason mirakile i ti ganny delivre.—Dan. 6:4-22.
2 Pareyman ozordi, nou devret fer zefor pour “reste vizilan e touzour fidel.” (Efe. 6:18) Sa lemonn ki nou pe viv ladan i dan “pouvwar dyab.” (1 Zan 5:19) Lopozisyon oubyen leprev i kapab arive en sel kou e teste nou lafwa. Pandan gran ladetres, bann serviter Bondye pou vin lobze latak Gog sorti Magog. Petet, nou pou krwar ki napa fason sove. Sa pou demann konfyans total dan Zeova.—Ezek. 38:14-16.
3 “En fakter byen enportan se fer lektir, letid e diskisyon efikas lo Labib an fanmiy vin en fason viv.” Sa parol ti ganny deklare dan lentrodiksyon pour dram dan lasanble distrik 1998 entitile “Families—Make Daily Bible Reading Your Way of Life!” I ti kontinyen: “Ler bann fanmiy i swiv en tel progranm regilyerman e dan en fason ki fer Labib vin vivan, en bon labitid koumsa i kapab annan en gran lefe lo fanmiy. I ogmant nou konnesans. I fortifye nou lafwa. I donn bann bon legzanp—bann zonm ek fanm fidel dan letan ansyen pour nou imite—ki kapab enspir nou, motiv nou pour defann laverite.” Pandan ki nou konsider plizyer laspe en bon progranm spirityel, bann sef fanmiy i devret rod enn oubyen de fason pour amelyor progranm spirityel zot fanmiy.
4 Konsider Parol Bondye toulezour: “Ler Rwayonm Bondye i dominen san okenn lopozisyon e son lavolonte i ganny fer lo later parey pe ganny fer dan lesyel, okenn move imen—ni menm zannimo—‘pa pou fer okenn ravaz.’ (Iza. 11:9; Mat. 6:9, 10)” Sa bann parol i trouve dan Egzamin Labib sak Zour—2001 (Angle/Franse) dan komanter pour teks le 11 Septanm. Sa rapel ti vreman rekonfortan! Konman en sef fanmiy, eski ou abitye sak zour konsider teks ek komanter avek ou fanmiy? Sa i vreman itil. Si i pa posib pour zwenn ansanm dan bomaten, petet ou kapab fer li plitar dan lazournen. En papa ti dir: “Repa aswar in vin en bon letan pour nou diskit Egzamin Labib sak Zour.”
5 Si ou deza annan en progranm regilye pour diskit Egzamin Labib sak Zour konman en fanmiy, nou felisit ou. Petet ou kapab benefisye plis par lir osi en porsyon dan Labib. Serten i annan labitid pour lir sa sapit an antye kot sa verse in ganny retire. Lezot i kontinyen lir, ziska ki zot fini lir en serten liv Labib. Lir Labib toulezour pou ed ou fanmiy kiltiv en dezir profon pour pa depler Zeova e pou ed zot anvi fer son lavolonte ankor plis.—Det. 17:18-20.
6 Ou progranm pour lir Labib e egzamin Labib sak zour pou vin pli itil si ou kapab pran detrwa minit pour diskit valer pratik sa lenformasyon. Liv Lekol Minister paz 60, i ofer sa sizesyon: “Ou kapab swazir detrwa verse dan progranm lektir Labib lasemenn, diskit zot sinifikasyon, e apre demann bann kestyon parey: ‘Konman sa i fourni gidans pour nou? Ki mannyer nou kapab servi sa bann verse dan predikasyon? Ki sa bann verse i fer nou konnen lo Zeova e lo son fason fer keksoz, e konman ki sa i batir nou lapresyasyon pour li?’ ” Bann konversasyon spirityel koumsa pou ed tou dimoun dan ou lakour pour “fer tou zot posib pour zot konpran konman Senyer i oule zot azir.”—Efe. 5:17.
7 Letid Fanmiy: Kondwir letid fanmiy regilyerman tou le semenn i en bon fason pour bann sef fanmiy montre zot zanfan ki keksoz spirityel i vin avan. En zennonm i rapel: “Parler Papa ti telman fatige sorti travay ki ti preski difisil pour li reste eveye, me kantmenm sa, letid ti ganny fer, e sa ti ed nou konpran ki letid i en keksoz serye.” Zanfan osi i kapab kontribye pour ki sa laranzman i mars byen. En fanmiy nef zanfan ti regilyerman lev senk er bomaten pour fer zot letid fanmiy akoz ti napa lezot letan ki disponib.
8 Pour letid fanmiy vin efikas, sef fanmiy i bezwen ‘fer konstaman atansyon avek son lansennyman.’ (1 Tim. 4:16) Liv Lekol Minister, paz 32, i deklare: “I ti a byen pour dir ki en letid fanmiy ki efektiv i konmans avek en egzaminasyon oprofon lo ou prop fanmiy li menm. Konman ki ou bann manm fanmiy pe progrese spirityelman? . . . Ler ou dan predikasyon avek ou zanfan, eski zot santi alez ler zot idantifye zot lekor konman bann Temwen Zeova devan zot kanmarad? Eski zot apresye ou progranm lektir ek letid Labib an fanmiy? Eski servi Zeova i vreman zot fason viv? En bon egzaminasyon pou revel ou, konman sef lafanmiy, ki ou bezwen fer pour kapab etablir e batir bann kalite spirityel dan sak manm fanmiy.”
9 Renyon Kongregasyon: Prepar e asiste bann renyon kongregasyon i devret vin en par enportan dan ou routin lasemenn. (Ebr. 10:24, 25) Parler, ou kapab prepar serten renyon an fanmiy. Olye ki ou esper ziska dernyen minit, eski ou kapab organize pour prepar byen davans? Bann bon labitid dan sa domenn pou amelyor kalite ou preparasyon ek bann benefis ki ou gannyen atraver sa bann renyon.—Prov. 21:5.
10 En progranm spirityel ki efikas i devret ganny fer regilyerman e dan en bon fason. Me ki ou pou fer si ou sitiasyon i fer li difisil pour ou prepar tou renyon? Liv Lekol Minister, paz 31, i fer sa sizesyon: “Evit sa bann pyez pour vitman pas lo sa bann lenformasyon zis pour dir ki ou’n fer li oubyen, pli pir ankor, pa etidye ditou sa bann lenformasyon parski ou pa kapab fini li. Plito, konnen ki kantite ou kapab etidye, e fer sa porsyon byen. Fer li sak semenn. Avek letan, esey enkli lezot renyon.”
11 Ler bann fanmiy i ariv boner dan bann renyon, sa i ede pour fer zot annan en leta lespri apropriye pour loue Zeova e benefisye avek lenstriksyon ki i fourni. Eski ou fanmiy i annan sa labitid ariv boner? I demann bon lorganizasyon ek korperasyon tou dimoun dan lakour. Si ou souvan dekouver ki ou fanmiy i bezwen depese e i anba presyon pandan bann zour renyon, eski ou kapab aziste ou progranm? Eski i annan keksoz ki devret ganny fer byen davans? Si en manm fanmiy i annan tro bokou keksoz pour fer, eski lezot i kapab ede? Eski i pou redwir presyon si tou dimoun ti pare pour al renyon detrwa minit davans? En bon lorganizasyon i kontribye pour kree en leta lespri lape dan fanmiy ek dan kongregasyon.—1 Kor. 14:33, 40.
12 Predikasyon: Fikse en letan pour partisip dan predikasyon i en lot keksoz dan bann bon labitid spirityel. En zennonm apele Jayson i rapel: “Mon fanmiy ti toultan dedye Sanmdi bomaten pour predikasyon. Sa ti byen pour mwan akoz pli mon ti sorti dan predikasyon, pli mon ti vwar dibyen ki i ti anmennen e pli mon ti kontan li.” Bokou ki’n ganny elve dan bann lakour Temwen in remarke ki annan en letan fikse pour predikasyon tou le semenn i ed zot pour progrese konman bann minis Kretyen.
13 En progranm regilye i osi kapab ede pour fer moman ki ou fanmiy i pase dan predikasyon vin pli agreab e pli prodiktif. Ki mannyer sa i kapab ganny akonpli? Latour Veyer le 1 Zilyet, 1999, paz 21 (Angle/Franse), ti fer sa komanter swivan: “Eski tanzantan ou servi letan dan ou letid fanmiy pour ed bann manm ou lakour prepar pour predikasyon? Sa i kapab anmenn bokou benefis. (2 Timote 2:15) I kapab ede pour zot servis vin pli prodiktif e annan plis lenportans. Parler, ou kapab dedye en sesyon letid antye pour fer en tel preparasyon. Laplipar-di-tan, ou kapab diskit bann diferan laspe predikasyon alafen letid fanmiy oubyen pandan en lot moman diran lasemenn.” Eski ou fanmiy in esey fer sa?
14 Kontinyen fer progre: Apre sa egzaminasyon, eski ou’n remark bann laspe kot ou fanmiy pe byen fer? Felisit zot, e esey fer amelyorasyon dan sa bann laspe. Si ou vwar detrwa laspe ki bezwen ganny amelyore, swazir enn ou de pour travay lo la premye. Ler zot in vin en labitid dan ou progranm spirityel, travay lo lezot. Fodre ki ou pozitif e rezonnab. (Fili. 4:4, 5) Etablir en progranm spirityel regilye pour ou lakour i demann bokou zefor, me i en zefor ki vo lapenn fer. Akoz Zeova i asir nou ki nou pou vwar son delivrans si nou fer sa.—Ps. 50:23.