Annan bon Labitid e rekolte bokou Benediksyon
1. Akoz i byen pour egzamin ou progranm spirityel?
1 Ler ou ti’n fek vin en Temwen, sirman ou ti fer bokou zefor pour annan en bon progranm spirityel, tel parey etidye Labib, asiste tou renyon, al prese e fer lapriyer. Finalman, ou ti progrese akoz Zeova ti beni ou bann zefor. Petet i annan en pe letan depi ler ou’n batize. Eski ou ankor annan sa bon labitid parey ler ou ti’n vin en Temwen?
2. Ki byenfe nou gannyen ler nou lir Labib toulezour?
2 Get en kou ou Labitid: Eski ou abitye lir Labib sak zour? Pa nou vreman ganny beni en kantite ler nou fer sa! (Zoz. 1:8; Ps. 1:2, 3) Lontan an Izrael, tou lerwa ti bezwen lir Lalwa “toudilon son lavi.” Ki byenfe i ti pou gannyen? I ti pou annan limilite dan son leker e annan respe pour Zeova, pour ki i pa rezet Son bann komannman. (Det. 17:18-20) Pareyman ozordi, kan nou lir Labib toulezour, sa i ed nou reste san defo e inosan dan sa move lemonn koronpi. I osi ed nou pour byen ekipe pour akonpli nou minister.—Fili. 2:15; 2 Tim. 3:17.
3. Ki byenfe nou gannyen ler nou asiste tou renyon regilyerman?
3 Zezi ti annan labitid al dan sinagog, kot zot ti diskit Lekritir. (Lik 4:16) San okenn dout, sa ti donn li kouraz pour fer fas avek bann difikilte ki i ti pou pas atraver. Nou osi nou ganny fortifye avek sa bann nouritir spirityel ki nou gannyen dan renyon, ek sa ‘lesanz lankourazman.’ (Rom. 1:12) Kan nou zwenn ansanm avek nou bann frer ek ser, sa i ed nou pour andir bann difikilte ki nou rankontre dan sa bann dernyen zour. (Ebr. 10:24, 25) Eski ou ankor annan labitid pour asiste tou renyon?
4. Ki byenfe nou kapab gannyen si nou sorti dan predikasyon tou le semenn?
4 Labib i dir nou ki toulezour bann zapot ti “prese dan Tanp ek dan bann lakaz e anons Zezi konman Mesi.” (Akt 5:42) Petet i pa posib pour nou prese toulezour, me eski nou kapab fer li en labitid pour partisip dan serten form predikasyon tou le semenn? Kan nou fer sa, nou pou kapab vin pli kalipa dan lafason ki nou mannye Labib, e nou pou kapab ganny plis leksperyans ki ankourazan ler nou pe partaz laverite avek lezot.
5. Akoz i enportan pour koz avek Zeova dan lapriyer regilyerman?
5 Profet Danyel ti ganny beni en kantite akoz i ti “kontinyen” servi Zeova toudilon son lavi. I ti annan labitid pour koz avek Zeova regilyerman dan lapriyer. (Dan. 6:10, 16, 20) Si nou osi nou senserman koz avek Zeova dan lapriyer, i pou donn nou son lespri sen. (Lik 11:9-13) Deplis, Zeova pou vin pros avek nou, e lo nou par nou pou kontan pour vin vreman pros avek li. (Ps. 25:14; Zak 4:8) Pa sa i en gran rekonpans! Alors, annou kontinyen travay dir pour gard bann bon labitid e rekolte bokou benediksyon sorti kot Zeova.