Kontinyen fortifye Kanmarad
1 Zapot Pol ti fer tou sa ki i kapab pour li fortifye son bann konpanyon Kretyen. (Akt 14:19-22) Nou osi, nou santi nou konsernen ler nou bann frer ek ser i rankontre bann sitiasyon difisil, e nou anvi ed zot. Labib i montre ki tou dimoun, pa zis bann ansyen, i devret demontre lentere dan lezot. (Rom. 15:1, 2) Annou egzamin de fason ki nou kapab pran aker sa bon konsey: ‘Kontinyen ankouraz e fortifye kanmarad.’—1 Tesa. 5:11.
2 Rekonnet Bezwen lezot: Parol Bondye i dir ki Dorkas ti “touzour okipe pe fer dibyen e pe ed bann pov.” (Akt 9:36, 39) I ti remark bann ki ti dan bezwen e i ti fer sa ki i kapab pour ed zot. Pa i’n kit en bon legzanp pour nou! Ou kapab tande ki en frer oubyen ser aze i bezwen en pasaz pour vin renyon. Oubyen i annan en pionye ki napa personn pour travay avek li dan predikasyon dan bann apremidi pandan lasemenn. Si ou rekonnet en tel bezwen e ou ofer ou led, mazinen konman sa dimoun pou ganny ankouraze!
3 Konversasyon spirityel: Nou osi kapab fortifye lezot par nou parol. (Efe. 4:29) En ansyen eksperyanse ti fer sa remark: “Si ou oule ankouraz lezot, koz avek zot lo bann keksoz spirityel. Pour konmans en konversasyon ki ankourazan, ou kapab demann en kestyon senp tel parey, ‘Ki mannyer ou ti aprann laverite?’” Montre en lentere senser dan bann zenn dan kongregasyon. Enterese avek bann ki dekouraze ek bann ki kapab en pe timid. (Prov. 12:25) Pa les diskisyon konsernan divertisman lemonn anpes ou fer bann bon konversasyon spirityel avek ou bann konpanyon Kretyen.—Rom. 1:11, 12.
4 Me ki ou kapab dir pour fortifye lezot? Eski dan ou letid ek lektir Labib ou’n fek vwar en prensip ki’n ogmant ou lapresyasyon pour Zeova? Eski ou’n ganny ankouraze par en keksoz ki ou’n tande dan en diskour piblik oubyen dan en letid Latour Veyer? Oubyen eski en leksperyans ki fortifye lafwa in tous ou? Si ou gard sa bann trezor spirityel, ou pou toultan annan en keksoz ankourazan pour partaz avek lezot.—Prov. 2:1; Lik 6:45.
5 Annou kontinyen fortifye kanmarad par ofer led e par byen servi nou lalang.—Prov. 12:18.