Kontinyen koz lo Parol Bondye avek Lardyes
1 Konman bann minis Kretyen, nou konnen ki pa tou dimoun ki pou ekout nou ler nou prese. (Mat. 10:14) Me nou pa les zot fason azir anpes nou pres sa bon nouvel. (Prov. 29:25) Kwa ki ed nou kontinyen koz lo Parol Bondye avek lardyes?
2 Zapot Pol ti apresye “sa valer bokou pli siperyer ki annan dan konnesans . . . Kris Zezi.” Sa ti fer li koz avek “lasirans konplet” oubyen konviksyon. (Fili. 3:8; 1 Tesa. 1:5) Menm si serten ti vwar sa mesaz ki i ti prese konman napa valer oubyen bet, i ti konnen ki i ‘pisans Bondye pour sov tou sa ki krwar.’ (Rom. 1:16) Alors menm ler i ti rankontre lopozisyon, i ti kontinyen “koz avek [lardyes], e ranpli avek konfyans dan [Zeova].”—Akt 14:1-7; 20:18-21, 24.
3 Nou Sours Lafors: Pol pa ti kapab donn temwannyaz san okenn lafreyer par son prop lafors. Ler i ti pe koz lo li menm ek Silas, i ti ekrir: “Malgre ki nou ti soufer e ganny maltrete dan lavil Filip . . . nou ti annan [lardyes] dan nou Bondye pour anons zot Levanzil Bondye devan gran lopozisyon.” (1 Tesa. 2:2, nou ki’n met an italik; Akt 16:12, 37) Deplis ler i ti dan prizon Ronm, Pol ti demande ki lezot i priy pour li afen ki i kapab kontinyen pres sa bon nouvel “avek [lardyes] parey i fodre.” (Efe. 6:18-20) Par depan lo Zeova olye lo li menm, i ti kapab kontinyen koz lo Parol Bondye avek lardyes.—2 Kor. 4:7; Fili. 4:13.
4 I menm parey ozordi. En frer ti vwar li tre difisil pour li dir son bann koleg travay ki i en Temwen Zeova e pour donn temwannyaz enformel. I ti priye e apre i ti konmans donn temwannyaz. Premye kou, enn son koleg pa ti oule ekoute, me ler i ti koz lo lespwar rezireksyon sa zonm ti aksepte en letid Labib. Depi sa, sa frer in sezi tou loportinite pour donn en temwannyaz. Dan en lot landrwa kot i ti al travay, i ti ed 34 dimoun ziska batenm pandan en peryod 14 an. Nou kapab asire ki Zeova pou donn nou osi lafors pour ‘kontinyen koz son parol avek lardyes san okenn lafreyer.’—Akt 4:29.