Anons Laglwar Zeova
1 En psalmis ti dir: “Sant pour Zeova, tou dimoun lo later. . . . Anons son laglwar parmi bann nasyon, son bann travay merveye parmi tou pep.” Ler nou reflesir lo sa ki Zeova in fer, pe fer, e pou fer pour nou, nou leker i pous nou pour anons son laglwar!—Ps. 96:1, 3.
2 Dan Predikasyon: Bann Temwen Zeova i annan privilez pour port non Bondye e pour loue li piblikman lo later antye. (Mal. 1:11) Pa zot diferan avek bann dirizan Kretyente ki annan lodas pour tir non Bondye dan zot tradiksyon Labib! Sa travay pour fer konnen non Bondye i irzan, vi ki dimoun i devret kriy non Bondye avek lafwa pour zot kapab ganny sove pandan sa gran ladetres. (Rom. 10:13-15) Deplis lape lo later antye, enkli lape parmi bann zabitan later, i depan lo glorifikasyon non Bondye. Wi, tou sa ki Bondye i fer i relye avek son non.
3 “Zeova i gran e i devret ganny loue enfiniman.” Me pour bann dimoun “donn Zeova sa laglwar ki pour son non,” zot devret konn laverite lo li. (Ps. 96:4, 8) Me serten dimoun pa oule aksepte ki Bondye i egziste. (Ps. 14:1) Lezot i dir ki i napa pouvwar, oubyen ki i pa enterese avek imen. Nou glorifye Zeova anmezir ki nou ed bann dimoun ki annan leker senser ganny konnesans egzakt lo nou Kreater, son plan, ek son personnalite atiran.
4 Par nou Kondwit: Zeova i ganny onore ler nou viv an armoni avek son bann standar drwat. Lezot i kapab remark nou bon kondwit. (1 Pyer 2:12) Par egzanp, kan nou prop e annord i kapab fer lezot fer bann bon komanter lo nou, e sa i donn nou loportinite pour koz lo bann byenfe ki nou gannyen ler nou viv dapre bann prensip dan Parol Bondye. (1 Tim. 2:9, 10) Pa nou kontan kan lezot i ‘vwar nou bann bon aksyon e glorifye nou Papa ki dan lesyel’!—Mat. 5:16.
5 Annou loue nou Bondye merveye sak zour par nou parol ek aksyon, ki montre ki nou pe reponn sa lapel atiran: “Sant pour Zeova, beni son non. Sak zour anons sa bon nouvel son delivrans.”—Ps. 96:2.