Montre Lentere senser—par byen obzerve
1 Zeova ek Zezi Kri i rekonnet tre byen bezwen spesifik bann dimoun e zot pare pour ede. (2 Kron. 16:9; Mark 6:34) Ler nou rekonnet sa ki enteres e trakas bann dimoun ki nou zwenn dan predikasyon, nou pou kapab adapte nou prezantasyon dapre sa ki enteres zot.
2 Get bann Detay: Zezi ti obzerv tre byen. (Mark 12:41-43; Lik 19:1-6) Dan menm fason, ler nou apros laport en dimoun e obzerv bann dekorasyon relizye, slogan lo zot transpor, oubyen zouzou deor, nou pou kapab kree loportinite pour donn en bon temwannyaz.
3 Lekspresyon lo figir en dimoun ek son fason azir i kapab dir nou en keksoz lo son santiman. (Prov. 15:13) Petet lanmor en dimoun ki i ti pros avek oubyen lezot sitiasyon difisil i fer li bezwen rekonfor. I pou kontan ler nou lir serten verse Labib apropriye avek li. (Prov. 16:24) Eski sa dimoun pe degaze pour ale oubyen i pe atrap en pti baba ki pe plere? Si i leka, i pli byen pour fer laranzman pour retournen en lot ler. Ler nou montre konsiderasyon ek konpasyon, sa pou ankouraz sa dimoun pour ekout nou ler nou retournen.—1 Pyer 3:8.
4 Adapte sa ki nou pou dir: Zapot Pol ti remarke ki lavil Atenn ti annan en lotel ki ti’n ganny dedye “Pour en bondye enkoni.” Sa ti enfliyans lafason ki i ti prezant sa bon nouvel akoz i ti dir: “Sanmenm sa Bondye ki zot adore san konn li, ki mon pe vin anons zot.” Lapros ki Pol ti servi avek bon zizman ti pous serten ki ti la pour ekout mesaz Rwayonm e vin krwayan.—Akt 17:23, 34.
5 Dan menm fason, ler nou byen obzerve, sa i ed nou rekonnet sa ki enteres en dimoun e i permet nou adapte nou lapros. Servi bann kestyon ki kapab ankouraz sa dimoun pour eksprim li. Mazin bann verse Labib ki kapab ganny servi pour ogmant son lentere. (Prov. 20:5) Ler nou byen obzerve e montre lentere senser dan lezot, sa pou ed nou prezant byen sa bon nouvel.