Ki mannyer pour ed en dimoun rezonn byen?
1. Ki lapros ki pli bon dan predikasyon?
1 Ki lapros ki pli bon dan predikasyon? Eski nou pou dir en dimoun ki son krwayans i mal oubyen nou pou ed li pour rezonnen pour ariv lo sa bon konklizyon? Zapot Pol ti toultan rezonn avek bann dimoun ki i ti pres avek. Par egzanp, apre ki i ti’n koz avek bann Zwif Tesalonik, “serten parmi zot ti krwar [son] parol.” (Akt 17:2-4) Ki mannyer nou kapab ed en dimoun pour rezonnen?
2. Ki mannyer nou kapab swiv legzanp Pol kan nou pe prese?
2 Pran an konsiderasyon son santiman ek lanvironnman kot i’n grandi: Pour kapab rezonn byen avek bann dimoun dan nou teritwar, nou bezwen pran an konsiderasyon zot santiman. Kan Pol ti pe koz avek bann Grek ki pa ti Kretyen kot Lareopaz, i ti konmans son diskour par mansyonn bann keksoz ki zot ti deza konnen e ki zot ti dakor avek. (Akt 17:22-31) Alors, kan ou pe prepar ou prezantasyon, pa oubliy krwayans ek pwennvi ki laplipar dimoun dan ou teritwar i annan. (1 Kor. 9:19-22) Si sa dimoun i soulev en lobzeksyon, esey rod en pwen ki zot annan an komen e koz lo la.
3. Ki mannyer nou kapab ed lezot rezonnen par byen servi kestyon?
3 Servi byen Kestyon: Nou pa pou kapab donn en dimoun direksyon pour ariv ver son destinasyon amwen ki nou konnen kote i ete egzakteman. Pareyman, nou pa pou kapab ed en dimoun pour tonm lo sa bon konklizyon amwen ki nou konn son lopinyon. Avan ki Zezi ti rezonn avek en dimoun, souvan i ti demann li kestyon pour konn sa ki i ti pe panse. Par egzanp, kan en dimoun ti demann Zezi ki fodre i fer pour ganny lavi eternel, Zezi ti esey konn son pwennvi avan ki i ti donn li en larepons. (Lik 10:25-28) En lot fwa, kan Pyer ti donn en move larepons, Zezi ti servi byen kestyon pour koriz son fason panse. (Mat. 17:24-26) Alors, si sa dimoun i demann en kestyon oubyen eksprim en move pwennvi, nou kapab servi kestyon pour ed li rezonnen.
4. Akoz nou devret esey ed en dimoun pour rezonnen?
4 Kan nou ed en dimoun pour rezonnen, nou pe imit Zezi nou Gran Ansennyan ek lezot evanzelizater dan premye syek ki ti annan sa lar pour rezonnen. Sa i osi montre ki nou respe dinyite sa dimoun ki nou pe pres avek. (1 Pyer 3:15) Finalman, sa dimoun pou pare pour resevwar nou kan nou retourn kot li.