Amelyor nou abilite pour prese—Konman pour reponn bann lobzeksyon dan teritwar
Akoz i enportan: Fer konmsi ou konnen ki en dezas pe al arive e si dimoun pa sove zot pou mor. Ou’n al kot ou vwazen pour averti li me i koup ou konversasyon e dir ou i okipe. Sirman, ou pa ti pou aret koz avek li dek ki i dir ou sa. Bokou dan nou teritwar i refize ekout nou akoz zot pa realize ki nou mesaz pou sov zot lavi. I kapab ki ler nou pe vizit zot, zot okipe. (Mat. 24:37-39) Oubyen petet zot annan bann fo konsep lo nou akoz bann fo rapor ki zot in tande. (Mat. 11:18, 19) Zot kapab panse ki nou parey tou lezot larelizyon ki’n prodwir bann move fri. (2 Pyer 2:1, 2) Si sa met lakour pa montre lentere o konmansman, nou pa devret ale koumsanmenm.
Ki mannyer pour fer li:
• Avan ou konmans predikasyon portanport, pran en pe letan pour mazin lo bann lobzeksyon ki ou kapab rankontre e fason ki ou pou reponn.
• Si sa met lakour i prezant en lobzeksyon, zantiman esey kontiny sa konversasyon. Petet ou kapab fer sa par felisit li. Par egzanp, si i dir ki i annan son prop larelizyon, ou kapab dir li, “Mon byen kontan mon’n zwenn en dimoun parey ou ki enterese avek keksoz spirityel.” Parfwa, ler nou montre ki nou konpran santiman oubyen sirkonstans sa met lakour, sa pou ed nou kapab kontinyen rann en temwannyaz. Par egzanp, si i dir i okipe, ou kapab dir li, “Mon konpran. Me avan mon ale, mon ti a kontan donn ou sa.” Osi, si sa met lakour i dir ki i pa enterese, demann li en kestyon. Ou kapab dir, “Eski se Labib ki ou pa enterese avek oubyen se larelizyon ki ou pa enterese avek?”
• Servi bon zizman. Pa oubliye ki Zeova pa fors personn pour ekoute. (Det. 30:19) Sak dimoun i bezwen anmenn son prop fardo, setadir son prop responsabilite spirityel. (Gal. 6:5) Si en dimoun pa oule sanz son nide, i pli byen si nou ale. Par demontre respe pour son santiman, nou pe kit laport ouver pour en lot proklanmater rann en temwannyaz pli tar.—1 Pyer 3:15.
Esey sa pandan sa mwan:
• Apre ki ou kit sa met lakour, diskit avek sa proklanmater ki pe akonpanny ou lo pli bon fason ki ou ti’n kapab reponn sa lobzeksyon ki ou’n gannyen.