Amelyor nou abilite pour prese—Ofer sa liv Ki Labib i dir

Akoz i enportan: Liv Ki Labib i vreman dir i en zouti de baz parmi nou bann piblikasyon ki nou servi pour ansenny lezot. Me, avan ki nou servi sa liv pour etidye avek en dimoun, nou bezwen kit en kopi avek li. Alor, nou tou nou bezwen fer zefor pour vin efikas pour ofer sa liv Ki Labib i vreman dir dan predikasyon. (Prov. 22:29) I annan plizyer opsyon e bann proklanmater i bezwen servi sa ki pli aplikab pour zot.

Ki mannyer pour fer li:

Demann en kestyon ki kapab evey lentere sa met lakour e montre li sa sapit dan sa liv ki reponn sa kestyon. Ou kapab menm servi enn parmi sa bann kestyon ki trouve o konmansman sak sapit. Apre ki ou’n ekout larepons sa met lakour, lir en verse apropriye, apre montre li sa paragraf ki koz lo sa size e petet an bref diskit lo la.
Konman en lot opsyon, ou kapab servi bann paz lentrodiksyon pour evey lentere sa met lakour e apre montre li kote dan sa liv ki montre larepons ki Labib i donnen. Par egzanp, ou kapab refer avek en maler ki’n fek pase dan nouvel e eksplike ki bokou dimoun in poz zot lekor sa bann menm kestyon ki ganny trouve lo paz 3. Ouswa ou kapab dir ki ou pe vizit ou bann vwazen pour partaz sa lespwar pour lavenir. Apre sa montre li bann portre lo paz 4 ek 5 e demande, “Lekel parmi sa bann promes ki ou ti a kontan vwar realize?” En lot fason fer i pour dir sa met lakour ki ou pe fer en pti vizit pour ed dimoun trouv larepons bann kestyon enportan dan lavi. Apre ou kapab montre li bann kestyon ki ganny trouve anba lo paz 6 e demann li pour swazir enn ki enteres li.
Servi lapros direk pour konmans en letid Labib. Ou kapab dir, “Nou pe montre nou bann vwazen sa piblikasyon ki kapab ed nou pour etidye Labib. Eski ou deza vwar sa liv avan? [Les sa met lakour reponn.] Si ou annan zis detrwa minit, mon ti a kontan montre ou ki mannyer ou kapab servi li ansanm avek ou Labib.”

Esey sa pandan sa mwan:

Fer bann repetisyon pandan Ladorasyon Fanmir.
Dan predikasyon, partaz sa prezantasyon ki ou’n prepare avek lezot proklanmater. (Prov. 27:17) Sanz ou prezantasyon si i pa efikas.