Ansenny avek sa brosir Bon nouvel
1. Ki mannyer sa brosir Bon nouvel in ganny fer?
1 Parey nou ti diskite dan Nou Minister Rwayonm Zilyet, enn parmi bann zouti pour ansennyen, i sa brosir Bon nouvel sorti kot Bondye! Bann verse Labib pa’n ganny site pour ki sa met lakour i kapab lir direkteman li menm dan Labib. Kontrerman avek nou bann piblikasyon pour etidye Labib kot sa dimoun i kapab lir e aprann lo li menm, sa enn piblikasyon in ganny fer pour etidye avek en ansenyan. I pour sa rezon ki ler nou ofer sa brosir, nou esey fer en demonstrasyon avek sa met lakour pour montre ki mannyer sa letid i ganny fer, pour li kapab vwar ki mannyer i gou pour aprann sa bon nouvel dan Labib.—Mat. 13:44.
2. Ki mannyer nou kapab servi sa brosir Bon nouvel lo en premye vizit?
2 Lo premye vizit: Ou kapab dir: “Mon’n vin kot ou akoz bokou dimoun i konsernen lo kote sa lemonn pe ale. Eski ou krwar ki kondisyon sa lemonn pou amelyore en zour? [Les sa dimoun reponn.] Dan Labib i annan bann bon nouvel ki kapab donn nou lespwar. La serten kestyon ki Labib i reponn.” Donn sa met lakour sa brosir e envit li pour swazir en kestyon lo dernyen paz. Apre servi sa premye paragraf dan sa leson pour montre ki mannyer en letid i ganny fer. En lot opsyon se pour demann sa met lakour en kestyon ki pou evey son lentere baze lo sa leson ki ou’n swazir e apre montre li ki mannyer sa brosir i kapab ed li trouv larepons baze lo Labib. Si i annan en video lo jw.org ki koresponn avek sa leson, ou kapab montre li.
3. Eksplike ki mannyer pour kondwir en letid par servi sa brosir Bon nouvel.
3 Konman pour kondwir letid: (1) Lir bann kestyon ki’n ganny enprimen an gro karakter pour ed sa met lakour konsantre lo sa pwen prensipal. (2) Lir sa paragraf ki swiv. (3) Lir sa bann verse Labib an italik e servi bann kestyon avek bon zizman pour sa met lakour vwar ki mannyer Labib i reponn sa bann kestyon. (4) Si i annan en lot paragraf anba sa kestyon, repet letap 2 ek 3. Si i annan en video ki koresponn avek sa kestyon ki ou’n demande e ou pa ankor montre li, fer li pandan sa moman. (5) Pour fini, demann sa met lakour pour reponn sa bann kestyon pour fer sir ki i konpran.
4. Kwa ki pou ed nou servi sa zouti presye avek skil?
4 Vin familye avek sa zouti presye. Servi li sak fwa ki i apropriye. Avan sak letid, mazin sa etidyan e sa pli bon fason pour rezonn avek li par servi bann verse Labib dan sa leson. (Prov. 15:28; Akt 17:2, 3) Anmezir ki ou ganny plis leksperyans ek skil, i posib ki sa brosir pou vin sa zouti prefere ki ou pou servi pour ansenny dimoun laverite!