Anmase

Eski ou pe servi sa bann brosir?

Labib—Ki son mesaz?

I’n ganny fer pour atir bann dimoun ki pa familye avek Labib, sirtou bann ki pa dan larelizyon Kretyen.

Fason pour ofer sa brosir: “Nou ti pou kontan ganny ou lopinyon lo sa ki’n ganny dir dan Lekritir (oubyen sa liv sakre). [Lir Psonm 37:11 ki ganny refer avek dan seksyon 11.] Ki mannyer ou krwar later pou ete ler sa profesi i ganny akonplir? [Les sa dimoun reponn.] Sa i zis en legzanp lespwar ek rekonfor ki Labib i donn tou kalite dimoun avek diferan krwayans.” Lir sa premye paragraf anler lo paz 3 e ofer sa brosir.

Ou kapab esey sa: Si ou pe etidye avek en dimoun ki pa dan en larelizyon Kretyen, pran en pe letan o konmansman oubyen a lafen sak letid dan liv Ki Labib i dir pour egzamin en seksyon dan sa brosir pour fer sa dimoun familyariz li avek Labib.

A Book for All People

I’n ganny fer pour atir bann dimoun ki annan en bon ledikasyon me ki pa konn bokou lo Labib

Fason pour ofer sa brosir: Lir 2 Timote 3:16, 17. Apre dir: “Eski ou dakor ki Labib in ganny enspire par Bondye? Oubyen ou mazinen ki i zis en bon liv? [Les sa dimoun reponn.] Nou’n remarke ki laplipar dimoun ki’n reponn sa kestyon pa’n zanmen egzamin Labib pour zot menm. [Lir sa leksperyans anba sa tit lo paz 3.] Sa brosir i byen enteresan, i donn dimoun sorti dan diferan kiltir ek krwayans bann bon rezon pour egzamin Labib.”

Ou kapab esey sa: Si sa dimoun i aksepte sa brosir, dir: “Enn bann rezon akoz dimoun i krwar ki mesaz Labib pa vreman enportan i akoz larelizyon pa’n koz laverite konsernan sa liv ek son lansennyman. Mon ti pou kontan donn ou en legzanp kan mon retournen laprosenn fwa.” Kan ou retournen, vwar serten sa bann lenformasyon lo paz 4-5.

Ou Kapab Vin Zanmi Bondye!

I’n ganny fer pour atir bann dimoun ki napa bokou ledikasyon oubyen ki pa tro konn lir

Fason pour ofer sa brosir: “Eski ou krwar ki i posib pour nou vin zanmi Bondye? [Les sa dimoun reponn. Apre lir Zak 2:23.] Sa brosir in ganny fer pour ed ou vin zanmi Bondye, zis parey Abraam.”

Ou kapab esey sa: Swa premye fwa ki ou zwenn sa dimoun oubyen letan ou fer retourn vizit, montre ki mannyer en letid Labib i ganny fer par diskit sa premye leson antye oubyen en bout ladan.

The Origin of Life​—Five Questions Worth Asking

I’n ganny fer pour atir bann zenn ki pe aprann evolisyon lekol e i pou osi ed nou pour rezonn avek bann ki krwar dan evolisyon ek bann ki pa asire oubyen pa krwar ditou dan Bondye (Sa brosir pa’n ganny fer pour ofer dan predikasyon portanport.)

Fason pour servi sa brosir kan nou pe koz avek en dimoun ki krwar dan evolisyon oubyen enn ki pa krwar dan Bondye: “Laplipar liv lasyans ozordi i ansenny evolisyon. Eski ou krwar evolisyon i vre oubyen ou krwar i zis en teori? [Les sa dimoun reponn.] Mon krwar ki ou pou dakor avek mwan ki pour en dimoun fer en bon desizyon i devret egzamin tou le de kote. Sa brosir i donn serten levidans ki’n fer bokou dimoun krwar ki lavi ti ganny kree.”

Ou kapab esey sa: Si ou lekol, kit sa brosir lo ou biro e vwar si i stimil kiryozite ou bann kanmarad lekol.

Why Should We Worship God in Love and Truth?

I’n ganny fer pour atir bann Endou

Fason pour ofer sa brosir: “I annan en lapriyer ki bokou Endyen i kontan fer kot zot demande pour zot vwar laverite ek laklerte. Eski ou krwar i enportan pour ador Bondye avek lanmour ek laverite? [Les sa dimoun reponn.] Remark sa ki Zezi ti dir lo sa size.” Lir Zan 4:24. Apre lir paragraf 4 lo paz 3 e ofer sa brosir.

Ou kapab esey sa: Si sa met lakour i aksepte sa brosir, dir: “Serten Endou ki annan lasazes i dir ki laverite i kasyet dan nou leker. Lezot i dir ki laverite i dan lekritir sakre. Laprosenn fwa, mon ti pou kontan diskit lo sa kestyon lo paz 4 paragraf 3: ‘Kote nou devret rode pour trouv laverite ki sorti kot Bondye?’”

The Pathway to Peace and Happiness

I’n ganny fer pour atir bann Boudis

Fason pour ofer sa brosir avek en dimoun aze ki Boudis: “Petet parey mwan, ou konsernen avek sa kantite konsept ki moralman sal ek lefe ki sa i annan lo nou bann zanfan. Akoz ou krwar limoralite in sitan ogmante parmi bann zenn? [Les sa dimoun reponn.] Eski ou ti konnen ki sa ti’n ganny predir dan en liv ki ti konmans ganny ekrir avan menm ki larelizyon Kretyen, Endou ek Mouslim ti konmanse. [Lir 2 Timote 3:1-3.] Remarke ki sa bann kondisyon pa ti sanze menm si zot ti kontinyen ganny lakonnesans. [Lir verse 7.] Sa lenformasyon dan sa brosir ti ed mwan konpran bann keksoz ki laplipar dimoun pa konnen. Ou ti pou kontan lir?”

Ou kapab esey sa: Ler ou retournen en lot fwa, apre ki ou’n ed sa dimoun devlop lentere dan Labib, montre li sa kestyon lo dernyen paz e montre li sa koupon pour ganny en liv Ki Labib i dir. Dir li ou annan en kopi sa liv avek ou e demann li si i ti a kontan vwar. Montre li konteni sa liv e egzamin enn oubyen de paragraf ki i swazir.

The Guidance of God​—Our Way to Paradise

I’n ganny fer pour atir bann Mizilman ki viv dan en lanvironnman kot zot santi zot lib pour etidye Labib

Fason pour ofer sa brosir: “Dapre konpran, bann mizilman i krwar dan zis en vre Bondye e osi tou bann profet. I vre sa? [Les sa dimoun reponn.] Mon ti pou kontan koz avek ou lo en profesi ki ti ganny prononse plizyer syek pase ki ti predir ki later pou vin en paradi. Eski mon kapab lir avek ou sa ki sa profet ti ekrir? [Lir Izai 11:6-9.] Plizyer dimoun i demann zot lekor ki mannyer Bondye pou kapab fer tousala avek later. Sa brosir i koz lo sa ki bann profet ti dir lo sa size.”

Ou kapab esey sa: Si sa met lakour i aksepte sa brosir, dir: “Liv ki Bondye in fer ekrir i eksplike ki o konmansman, zonm ti viv dan paradi. Laprosenn fwa ki nou zwenn, mon ti pou kontan reponn sa kestyon ‘Ki mannyer zonm pa ti swiv gidans Bondye e perdi paradi?’” Ler ou retournen, diskit konmansman sa seksyon ki konmans lo paz 6.

Real Faith​—Your Key to a Happy Life

I’n ganny fer pour atir bann Mizilman ki viv dan en landrwa kot zot santi zot lib pour etidye Labib

Fason pour ofer sa brosir: Montre li sa portre lo paz 16-17 e dir: “Sa portre i vreman diferan avek sa ki nou vwar dan lemonn ozordi. Eski ou krwar ki i posib pour lemonn en zour vin parey lo sa portre? [Les sa dimoun reponn.] Remarke ki sa liv Bondye i promet. [Lir enn sa bann verse ki’n ganny site dan ou Labib.] Sa brosir i ed nou pour devlop lafwa solid ki sa promes pou sirman vin vre.”

Ou kapab esey sa: A lafen sa konversasyon, demann sa dimoun pour swazir en kestyon lo dernyen paz sa brosir. Apre fer laranzman pour diskit lo larepons dan sa brosir kan ou retournen.