En nouvo brosir pour nou ofer!
1. Ki nou pou ofer pandan mwan Novanm, e ki bi sa piblikasyon?
1 Dan Lasanble Distrik 2009 ki ti annan pour tenm ‘Kontinyen veye!,’ nou ti ganny sa nouvo brosir ki annan pour tit Labib—Ki son mesaz? Tou kongregasyon dan lemonn antye pou ofer sa brosir pour premye fwa pandan mwan Novanm. Ki mannyer sa piblikasyon pou benefisye bann dimoun dan nou teritwar? Laplipar dimoun pa konn bokou lo Labib, espesyalman bann ki dan bann larelizyon ki pa Kretyen. Lo paz 3 i eksplike ki sa brosir in ganny fer pour donn “en pti apersi lo Labib.”
2. Ki mannyer nou kapab ofer sa brosir?
2 Konman nou pou ofer sa brosir: Nou kapab dir en keksoz koumsa: “Nou ti pou kontan konn ou lopinyon lo sa ki sa verse pe dir. [Lir 2 Timote 3:16.] Bokou dimoun ki nou koz avek i dakor avek sa bann parol, me lezot i santi ki Labib i zis en liv enteresan. Ki ou pwennvi lo Labib? [Les sa dimoun reponn.] Nenport ki krwayans ki nou kapab annan, nou annan bon rezon pour egzamin Labib pour nou menm. [Lir sa premye paragraf anler lo paz 3.] Amezir ki ou lir sa rezimen lo Labib dan sa brosir, ou pou remark en keksoz enteresan. Ou pou vwar ki Labib i annan zis en tenm ek en mesaz!”
3. Ki fason nou kapab ofer sa brosir dan teritwar kot bann dimoun i dan en larelizyon ki pa Kretyen?
3 Sa i en lot fason ki nou kapab ofer sa brosir, espesyalman kan nou pe pres dan en landrwa kot bokou dimoun i dan en larelizyon ki pa Kretyen: “Nou ti pou kontan konn ou lopinyon lo sa ki Lekritir (oubyen sa liv Sakre) i dir dan sa verse. [Lir Psonm 37:11.] Ki mannyer ou krwar later pou ete kan sa profesi i ganny akonplir? [Les sa dimoun reponn.] Sa i zis en legzanp lespwar ek rekonfor ki dimoun ki sorti dan nenport kiltir e ki annan diferan krwayans i kapab gannyen atraver Labib.” Lir sa premye paragraf anler lo paz 3, e ofer sa brosir.
4. Ki mannyer nou kapab servi sa brosir pour konmans en letid Labib?
4 Konmans en letid Labib: Kan nou retournen, nou kapab fer sa dimoun mazin sa konversasyon ki nou ti annan avek li e koz lo enn de paragraf baze lo sa size ki nou ti diskite e servi sa bann kestyon ki trouve a lafen sa seksyon ki nou pe diskit lo la. Oubyen si nou anvi entrodwir liv Ki Labib i dir deswit, nou kapab lir avek sa dimoun sa ki’n ganny ekrir deryer lapo sa brosir, donn li sa liv, demann li ki sapit ki ti pou pli enteres li, e koz lo enn oubyen de paragraf dan sa sapit ansanm. Annou tou partisip plennman pour ofer sa brosir pandan mwan Novanm!