Eski ou pe servi Brosir Ekspekte pour konmans bann Letid?
1 Eski ou’n realize ki si ou pe fer bann diskisyon lo Labib avek en dimoun enterese, kantmenm i bref me i regilye e dan en fason annord e ou pe diskit lenformasyon dan en piblikasyon ki ganny rekomande, ki an realite ou pe kondwir en letid Labib? Wi, sa i vre menm si sa letid i ganny fer devan en laport oubyen par telefonn. Akoz ou pa fer en zefor spesyal pandan mwan Me ek Zen pour konmans en tel letid par servi brosir Ekspekte?
2 Ou bezwen prepare pour reisi: Sa ki ou anvi diskite i bezwen byen kler dan ou lespri, ler ou pe ofer brosir Ekspekte. Si ou pe fer en retourn vizit, mazin sa konversasyon ki ou ti gannyen lo ou premye vizit. Demann ou lekor: ‘Ki paragraf dan sa brosir ki mon kapab atir latansyon sa dimoun lo la pour kontiny sa diskisyon e konmans en letid Labib?’ Si ou pe pres port-an-port, konsider ki topik ki pou enteres en adolesan, en dimoun pli vye, en zonm, oubyen en fanm. Egzamin konteni sa brosir, e idantifye en topik ki pou enteres sa dimoun. Apre ki ou’n deside ki mannyer ou pou apros sa dimoun, egzers li plizyer fwa. Sa i en fason pour ou kapab reisi.
3 Sipleman dan Nou Minister Rwayonm Zanvye 2002 i donn “Bann Sizesyon pour prezant Brosir Ekspekte.” I annan wit sizesyon. Sa bwat “Lapros direk” i montre konman pour servi sa brosir pour konmans bann letid. Ou kapab adapte sa premye sizesyon dan sa fason:
◼ “Eski ou ti konnen ki dan zis detrwa minit, ou kapab trouv larepons en kestyon enportan dan Labib? Par egzanp, akoz i annan sitan bokou relizyon ki pretann ki zot Kretyen? Eski ou’n deza reflesir lo sa?” Apre ki sa dimoun in reponn, vir dan leson 13 e diskit sa de premye paragraf. Si i annan letan, lir e diskit enn oubyen de verse Labib. Apre lir sa dernyen kestyon okonmansman paz 26, e finalman dir sa dimoun: “Larestan sa leson i fer resorti senk mark ki idantifye sa vre relizyon. Mon ti a kontan retournen e egzamin zot avek ou.”
4 Kontinyen eseye: Profit tou loportinite pour demontre ki mannyer pour fer en letid Labib dan brosir Ekspekte. Demann benediksyon Zeova. (Mat. 21:22) Par persiste dan ou zefor, ou kapab eksperyans sa lazwa pour ed en dimoun aksepte sa bon nouvel!