Ki mannyer pour konmans en letid Labib avek dimoun ki nou donn magazin
1. Ki nou lobzektif ler nou pe plas magazin?
1 Zeneralman dan Sanmdi nou prezant Latour Veyer ek Awake! dan predikasyon. Parkont, sa i zis en premye pa pour akonpli nou lobzektif pour ansenny laverite bann ki annan en leker senser. Pli ba i annan serten sizesyon lo konman pour plas liv Ki Labib i dir lo en retourn vizit e konman pour konmans en letid Labib. Ou kapab adapte sa bann sizesyon dapre ou teritwar e eksprim zot dan ou prop mo. Ou kapab servi en lot lapros si i pli efikas pour ou.
2. Ki mannyer nou kapab servi paz lentrodiksyon dan liv Ki Labib i dir pour konmans en letid Labib?
2 Servi paz lentrodiksyon: Ler ou retournen, ou kapab dir: “Bann magazin ki mon ti kit avek ou i diriz latansyon lo Labib. Remarke akoz lir Labib i sitan enportan.” Lir Izai 48:17, 18; Zan 17:3; oubyen en lot verse Labib ki apropriye. Apre ki ou’n entrodwir liv Ki Labib i dir e ou’n donn sa met lakour en kopi, ou kapab kontiny koumsa:
◼ “Labib i donn nou en vre lespwar pour lavenir.” Montre sa met lakour paz 4-5, e demann li, “Lekel parmi sa bann promes ou ti pou kontan i vin vre?” Montre li sa sapit ki diskit sa promes dan Labib ki i’n swazir, e konsider enn ou de paragraf an bref si i dakor.
◼ Oubyen ou kapab dir, “Labib i reponn bann kestyon ki vreman enportan lo lavi.” Atir son latansyon lo paz 6, e demann li si i’n deza reflesir lo okenn sa bann kestyon anba lo sa paz. Vir lo sa sapit ki reponn sa kestyon, e diskit enn ou de paragraf an bref.
◼ Oubyen ou kapab montre li serten tit dan konteni sa liv e demann li lekel parmi sa bann size ki enteres li. Vir lo sa sapit, e an bref, montre li konman en letid Labib i deroule.
3. Konman nou kapab konmans en letid Labib apre ki nou’n plas bann magazin ki koz lo (a) kondisyon lemonn ki pe deteryore? (b) lafanmir? (c) konfyans dan Labib?
3 Demann en kestyon lo premye vizit: En lot opsyon, se pour etablir en baz pour en retourn vizit lo ou premye vizit. Apre ki met lakour in aksepte magazin, demann en kestyon e promet pour reponn li laprosenn fwa ki ou retournen. Fer bokou zefor pour fer bann laranzman spesifik pour retournen, e fer sir ou gard ou parol. (Mat. 5:37) Ler ou retournen, rapel met lakour sa kestyon, e an bref lir e diskit larepons dan liv Ki Labib i dir. Donn li en kopi pour ki i kapab swiv. La detrwa legzanp.
◼ Si magazin ki ou’n plase pe koz lo bann kondisyon lemonn ki pe deteryore, ou kapab dir, “Laprosenn fwa nou kapab diskit larepons dan Labib pour sa kestyon, Ki bann sanzman Bondye pou anmennen lo later?” Servi paz 4-5 ler ou retournen. Oubyen ou kapab demann sa kestyon, “Eski bann maler ki arive i lavolonte Bondye?” Ler ou retournen, montre met lakour paragraf 7-8 dan sapit 1.
◼ Si magazin ki ou’n plase pe koz lo lafanmir, avan ou ale ou kapab soulev sa kestyon, “Kwa ki sak manm fanmir i kapab fer pour fer lavi fanmir pli gou?” Ler ou retournen, diskit paragraf 4 dan sapit 14.
◼ Si magazin ki ou’n plase pe koz lo konfyans dan Labib, ou kapab soulev sa kestyon pour ou lot diskisyon, “Eski Labib i dir laverite lo kote lasyans?” Ler ou retournen, diskit paragraf 8 dan sapit 2.
4. Ki nou devret fer si sa met lakour pa oule sa liv Ki Labib i dir?
4 Alafen sak diskisyon, demann en lot kestyon ki pou ganny reponn lo lot vizit. Enn fwa ki en letid regilye in ganny etabli, etidye sa liv dan lord depi konmansman ziska finisyon. Me si sa met lakour pa oule sa liv Ki Labib i dir? Ou kapab kontinyen anmenn bann magazin e fer bann diskisyon lo Labib avek li. Anmezir ki ou devlop son lentere, avek letan i kapab aksepte en letid Labib.
5. Akoz nou devret fer bokou zefor pour pa zis kit magazin avek dimoun?
5 Latour Veyer ek Awake! i kapab ankouraz en dimoun pour aprann sa ki Labib i vreman dir. Alors, fer en zefor spesyal pour konmans en letid Labib avek bann ki aksepte magazin. Dan sa fason, nou pou obei lenstriksyon Zezi pour ‘fer disip . . . , ansenny zot.’—Mat. 28:19, 20.