Distribisyon spesyal nimero Awake! pour mwan Novanm!
1 Bokou dimoun i annan bann kestyon senser lo valer ki Labib i annan. Serten i dir, si zonm ki’n ekrir Labib, akoz i ganny apele Parol Bondye? Akoz mon devret annan konfyans dan Labib pour diriz mon lavi? Si mon lir e etidye Labib, ki mannyer mon letan ek zefor pou ganny rekonpanse? Ki tradiksyon Labib mon bezwen servi? Sa i zis detrwa kestyon ki pou ganny reponn dan sa nimero spesyal Awake! pour mwan Novanm ki annan pour tit “Eski mon kapab annan konfyans dan Labib?”
2 Nou tou nou pou kontan distribye sa lartik spesyal Awake! dan nou bann teritwar. Si i posib, partisip ansanm avek kongregasyon dan predikasyon portanport sak Sanmdi pandan mwan Novanm. Ou kapab montre sa lartik Awake! avek ou fanmir, vwazen, koleg travay, ansennyan, kanmarad lekol ek ou bann retourn vizit. Anmenn detrwa kopi avek ou ler ou pe al fer konmisyon, e ler ou pe vwayaze. Bann ansyen in rekomann bann kopi ekstra pour kongregasyon pour ki i annan ase dan stok.
3 Konmans en letid Labib: Si ou plas sa magazin, ou kapab kit en baz pour en letid Labib avan termin ou konversasyon. Par egzanp, ou kapab dir: “Prosenn fwa, mon pou montre ou larepons dan Labib pour sa kestyon, ‘Ki plan Bondye pour later?’” Apre sa retourn avek sa liv Ki Labib i dir e montre sa met lakour paz 4-5, ouswa diskit avek li paragraf 1-3 dan sapit 3. En lot keksoz ou kapab dir se, “Prosenn fwa, mon ti a kontan diskit avek ou en profesi Labib ki pe ganny akonplir la konmela.” Kan ou retournen ou kapab montre sa met lakour sapit 9 dan sa liv e vwar ansanm avek li paragraf 1-3. Oubyen ou kapab senpleman dir sa met lakour: “Bokou i vwar li difisil pour konpran sa ki zot lir dan Labib. Prosenn fwa mon ti a kontan montre ou ki mannyer ou pou pli kapab konpran Labib.” Ler ou retournen, entrodwir li avek sa liv Ki Labib i dir e montre li ki mannyer en letid i ganny fer.
4 Zis Labib tousel ki annan “Lekritir sakre” ki pou ed nou pour donn “lasazes ki [kondwir] dan lavi eternel.” (2 Tim. 3:15) Alors, pa nou tou nou pou anvi avek devouman distribye sa lartik spesyal Awake! pour ed lezot pour annan konfyans dan Labib!