Anmenn magazin tou le mwan i itil pour konmans letid Labib
1. Akoz lorganizasyon Zeova i ankouraz bann proklanmater pour anmenn magazin tou le mwan kot bann met lakour?
1 Bokou dimoun pa anvi etidye Labib avek nou, me zot kontan lir nou bann magazin. Se pour sa ki lorganizasyon Zeova i kontan ankouraz bann proklanmater pour anmenn magazin tou le mwan kot bann met lakour. Anmezir ki dimoun i regilyerman lir nou bann magazin, zot souvan devlop lentere dan Parol Bondye. (1 Pyer 2:2) Petet, sa ki zot lir i kapab enpresyonn zot e pous zot pour aksepte en letid Labib.
2. Ki mannyer nou kapab devlop lentere bann ki nou kit magazin avek tou le mwan?
2 ‘Aroz’ lagrenn laverite: Dan plas zis kit magazin e apre ale, konmans en konversasyon avek sa met lakour e esey fer zanmi avek li. Sa pou ed ou konn son sirkonstans, lentere ek krwayans pour ki ou kapab koz avek disernman. (Prov. 16:23) Prepar sak vizit. An bref, si i posib fer resorti en pwen e lir en verse dan sa magazin akoz sa i kapab aroz nenport lagrenn laverite dan son leker. (1 Kor. 3:6) Ekri dat sak vizit, sa magazin ki ou’n kite, topik ek verse Labib ki’n ganny diskite.
3. Kan ki nou retournen pour vizit bann ki nou kit magazin avek tou le mwan?
3 Kan ki ou retournen? Ou devret retourn enn fwa par mwan pour anmenn bann nouvo magazin kot sa dimoun ki ou kit magazin avek tou le mwan. Par kont, i pou depan lo ou sirkonstans ek lentere sa dimoun pour ou kapab vizit li pli souvan. Par egzanp, enn ou de semenn apre ki ou’n kit sa bann magazin, ou kapab dir, “Mon’n pase pour montre ou en pwen dan sa magazin ki mon ti kit avek ou.” Sa pou fer sa dimoun anvi lir sa lartik. Si i ti’n deza lir, ou kapab demann li ki i panse lo sa lartik e an bref diskit lo la oubyen si i kontan lir nou piblikasyon, ou kapab retournen e ofer li sa trak, brosir oubyen liv ki nou pe ofer pour sa mwan.
4. Ki nou kapab fer tanzantan pour konnen si bann ki nou kit magazin avek tou le mwan i pare pour aksepte en letid Labib?
4 Pa bezwen esper sa met lakour demann ou en letid Labib. Pran linisyativ. Menm si avan i ti refize pour etidye Labib, tanzantan ou kapab montre li sa lartik dan Latour Veyer ki annan pour tit “Labib i reponn” e vwar si i pare pour diskit lo la. Petet ou kapab konmans en letid Labib devan laport. Par kont, si ou pa kapab konmans en letid, ou kapab kontinyen anmenn bann magazin pour pourswiv son lentere.