Devlop Lentere bann Dimoun ki nou abitye donn Magazin
1. Ki mannyer nou kapab devlop lentere dimoun ki nou abitye donn bann magazin?
1 Bokou dimoun ki nou zwenn dan predikasyon i kontan nou vizit e aksepte nou piblikasyon avek bokou plezir me zot ezite pour aksepte en letid Labib regilye. En fason ki nou kapab devlop zot lentere i ler nou abitye donn zot bann magazin. Ler ou plas bann magazin, ekrir non sa dimoun ek son ladres, dat ki ou ti zwenn li, sa ki i ti aksepte, e verse Labib ki ti ganny diskite, ansanm avek nenport keksoz ou’n remarke i enteres sa dimoun. Ler ou ganny bann nouvo magazin, rod bann pwen ki pou enteres bann dimoun ki ou abitye donn bann magazin. Fer resorti sa bann pwen ler ou vizit zot. (1 Kor. 9:19-23) Avek letan, en keksoz ki zot lir dan nou bann magazin i kapab stimil zot lentere e fer zot anvi aprann plis.
2. Akoz konmela i irzan pour dimoun rod Zeova, e ki nou kapab fer anplis pour ed zot?
2 Me nou konnen ki laplipar dimoun pa pou vin bann serviter Zeova zis par lir bann magazin lo zot menm. Vi ki konmela i irzan pour dimoun rod Zeova, ki nou kapab fer anplis pour ed zot? (Tsef. 2:2, 3; Rev. 14:6, 7) Nou kapab devlop zot lentere ler nou partaz en verse Labib ki nou’n swazir avek bokou latansyon sak fwa nou anmenn bann magazin.
3. (a) Ki mannyer nou kapab prepar en seri diskisyon baze lo en verse Labib? (b) Ki size ki pli enteres dimoun dan ou teritwar?
3 Diskit en Verse Labib: Mazin bann dimoun ki ou donn magazin, e prepar en seri diskisyon kot ou pou diskit en verse Labib dapre bezwen sak sa bann dimoun. (Fili. 2:4) Par egzanp, si en dimoun in fek perdi en dimoun ki i kontan dan lanmor, ou kapab profit plizyer retourn vizit pour diskit sa ki Labib i dir lo kondisyon bann mor ek lespwar rezireksyon. Lenformasyon dan liv Comment raisonner anba size prensipal “Lanmor” ek “Rezireksyon” i kapab ganny servi pour prepar sa bann diskisyon ki baze lo en verse. Lezot diskisyon i kapab swiv lo bann size ki relye avek sa, tel parey ki mannyer maladi, lavyeyes, ek lanmor pou ganny eliminen konpletman. Lobzektif se pour trouv en size ki enteres sa dimoun e ptit-a-pti montre li ki Labib i dir lo sa size.
4. Akoz i enportan pour ed lezot konpran en verse Labib ki nou servi, e konman nou kapab fer sa?
4 Ed zot konpran: Menm si i byen pour gard sa bann diskisyon senp e bref, nou bezwen fer plis ki zis lir sa verse ki’n ganny swazir. Satan in avegle lespri bann dimoun anver sa bon nouvel. (2 Kor. 4:3, 4) Menm bann ki familye avek Labib i bezwen led pour konpran li. (Akt 8:30, 31) Alor, pran letan pour eksplik e donn legzanp lo sa verse, parey ou ti pou fer dan en ekspoze dan Lekol Minister Teokratik. (Akt 17:3) Fer sir ki sa dimoun i vwar valer pratik Parol Bondye dan son lavi.
5. Ki mannyer nou kapab ganny en letid avek en dimoun ki nou abitye donn bann magazin?
5 Si sa dimoun i kontan sa ki i pe aprann, dousman dousman diskit en pe plis par enkli de ou trwa verse Labib lo sak vizit. Rod loportinite pour entrodwir brosir Ekspekte oubyen liv Konnesans. Dan sa fason, finalman nou kapab ganny en letid Labib avek en dimoun ki nou abitye donn bann magazin.