Retourn Vizit i anmenn ver Letid Labib
1. Akoz retourn vizit i tre enportan?
1 Zezi ti demann son bann disip pour pa zis prese me osi pour fer “disip. . . . Ansenny zot.” (Mat. 28:19, 20) En proklanmater i proklanmen, me en ansennyan i fer plis ki sa. I enstri, eksplike, e donn laprev. En fason ki nou ansenny lezot se par fer bann retourn vizit avek dimoun ki enterese avek lobzektif pour konmans bann letid Labib.
2. Lekel ki ou kapab retournen pour vizite?
2 Lekel ki ou devret retournen pour vizite? Fer sir ou retourn kot tou bann ki’n aksepte piblikasyon ouswa ki’n montre menm zis en pti gin lentere dan sa bon nouvel. Si ou zwenn en dimoun ki enterese ler ou pe pres dan en landrwa piblik, esey ganny son ladres oubyen nimero telefonn pour ki lentere sa dimoun i kapab ganny kiltive. Ou devret reste pozitif konsernan konmans bann letid Labib. Kontinyen rod bann ki pou aksepte en letid Labib, e probableman ou pou trouv zot.—Mat. 10:11.
3, 4. Kwa ki enplike pour fer bann retourn vizit efikas?
3 Montre Lentere personnel: Preparasyon pour fer en retourn vizit efikas i konmans lo premye vizit. Bann proklanmater ki reisi dan predikasyon i remark byen sa ki enteres sa met lakour, e zot servi sa konman en baz pour plis diskisyon. Serten i trouv li itil pour demann en kestyon alafen vizit pour stimil lentere sa dimoun pour lot vizit. Nou lentere senser dan dimoun i fer nou kontinyen mazin zot, menm apre ki nou’n kit zot lakour, e i pous nou pour retournen san tarde. Si i posib, esey retournen kan lentere sa dimoun i ankor for. Petet dan lespas enn oubyen de zour.
4 Ler ou pe fer en retourn vizit, esey kontiny ou konversasyon baze lo sa ki ou ti diskite dan ou premye diskisyon. Sak fwa ki ou vizit sa dimoun fer li ou lobzektif pour partaz omwen en pwen biblik ankourazan, e pare pour ekoute. Esey konn sa met lakour pli byen. Apre, lo bann lezot vizit, partaz laverite sorti dan Parol Bondye ki pli relye avek son lentere.
5. Ki metod senp ki kapab ganny servi pour konmans letid Labib?
5 Vey Loportinite pour konmans en Letid Labib: Fer retourn vizit avek lobzektif pour konmans en letid Labib. Konman sa i kapab ganny fer? Fer resorti ki ou ti pou kontan partaz en panse enteresan, e ouver liv Konnesans oubyen brosir Ekspekte lo en paragraf ki ou krwar pou enteres sa dimoun. Lir sa paragraf, konsider sa kestyon, e diskit enn oubyen de verse ki’n ganny mansyonnen. Sa i kapab ganny fer direkteman devan laport dan senk a dis minit. Konklir par demann sa lot kestyon e aranze pour kontiny diskisyon en lot fwa.
6. Konman nou kapab montre ki nou apresye lenportans pour fer bann retourn vizit?
6 Kiltiv lentere tou dimoun ki nou zwenn i en laspe enportan nou minister. Alors, met letan dekote dan ou progranm lasemenn pour fer bann retourn vizit. Par fer sa, ou minister pou vin pli efikas e i pou anmenn vre lazwa.