Preparasyon—En lakle pour retourn vizit ki efikas
1. Dan ki fason sa travay predikasyon ti pou agrandi?
1 Zezi ti kontinyelman prepar son bann disip pour vin bann proklanmater ki efikas pour anons ‘sa bon nouvel rwayonm.’ (Mat. 4:23; 9:35) Zot ti ganny sa formasyon kan zot ti pe prese zis dan Palestin. Toudmenm, avan i ti mont dan lesyel, Zezi ti fer konnen ki sa travay predikasyon ti pou agrandi e sa ti pou fer li posib pour “tou pep vin [son] bann disip.”—Mat. 28:19, 20.
2. Kwa ki enplike dan obeir sa komannman ki Zezi ti donnen ‘pour fer disip’?
2 Sa travay ti pou enkli rod bann endividi ki annan sa lentere dan sa bonn nouvel lo Rwayonm Bondye e ansenny zot pour obeir tou sa ki Zezi in komande. Pour fer bann retourn vizit ki efikas, nou bezwen byen prepare.
3. Ki mannyer ou kapab kree en loportinite pour en retourn vizit?
3 Fer plan davans: Serten proklanmater i soulev en kestyon a lafen zot premye vizit e zot promet pour retournen pour diskit larepons dan en prosen vizit. Zot in dekouver ki par fer referans avek lenformasyon dan sa liv Ki Labib i dir lo zot retourn vizit, in ed zot pour direkteman konmans en letid Labib.
4. Akoz nou pa devret esper bann nouvo magazin pour fer retourn vizit?
4 Menm si nou ganny en Latour Veyer ek en Awake! par mwan, sa pa vedir ki nou devret esper lot mwan kan bann nouvo magazin i vini pour nou fer nou retourn vizit. Nou kapab kontinyen stimil lentere sa dimoun par diskit lo lenformasyon dan sa magazin ki sa dimoun i deza annan.
5. Lefet ki ou annan en lobzektif, ki byenfe ou pou gannyen ler ou fer en retourn vizit?
5 Annan en lobzektif: Avan ler ou retournen, pran en pti pe letan pour revwar ou not e vwar kwa ki ou ti a kontan akonplir. Par egzanp, diskit lo en pwen dan sa piblikasyon ki ou ti kite resaman. Oubyen kit lezot piblikasyon ki relye avek sa konversasyon ki ou ti koz lo la dernyen fwa. Si dernyen fwa ou ti poz en kestyon, ou lobzektif pou sirman enkli reponn sa kestyon. Ler ou pe met lanfaz lo en verse ki siport en pwen ki ou’n fer resorti, fer zefor pour lir sa verse direkteman dan Labib.
6. Ki nou lobzektif kan nou pe fer retourn vizit?
6 Nou lobzektif: Byensir, nou lobzektif se pour konmans en letid Labib. Pandan en retourn vizit, en frer ti ofer en letid Labib, me sa zonm ti refize. Sa frer ti retourn avek bann nouvo magazin e dir, “Vi ki nou la, nou pe servi Labib pour reponn en kestyon ki enteres bokou dimoun ozordi.” Apre ki sa zonm ti’n fini reponn, sa frer ti lir en verse dan Labib e i ti servi en paragraf apropriye dan en piblikasyon ki servi pour konmans en letid Labib. En letid Labib ti komanse.
7. Ki mannyer en bon preparasyon i kapab ed ou pour konmans en letid Labib?
7 Si ou pran letan pour prepare avan ler ou fer retourn vizit, ou zefor pou vo lapenn. Nou pou annan plis lazwa e nou pou annan sa privilez pour ed bann ki annan sa “bon kondisyon leker” pour ganny lavi eternel.—Akt 13:48, NW.