Ed bann ki annan sa bon Latitid
1. Lekel ki Zeova pe rasanble dan nou letan?
1 Sak dimoun i annan en serten kalite latitid dan li pour fer en serten keksoz. (Mat. 12:35) Labib i koz lo en dimoun ki son “leker i tant pour lager.” (Ps. 55:21) Serten dimoun i “tant pour pran lakoler.” (Prov. 29:22) Me i osi annan bann ki annan sa bon latitid pour lavi eternel. (Akt 13:48) Dan nou letan, Zeova pe rasanble sa bann ki annan sa bon latitid pour resevwar son Parol. (Aga. 2:7) Ki mannyer nou kapab ed zot pour vin bann adorater Zeova?
2. Kwa ki enplike pour akonpli nou travay pour fer disip?
2 Fer sir ou fer bann Retourn Vizit: Pour nou kapab akonpli nou travay pour fer disip, i tre enportan ki nou annan sa bon pwennvi konsernan fer bann retourn vizit. (Mat. 28:19, 20) Eski nou fer zefor pour pa tarde pour devlop lentere bann dimoun? Eski nou revizit tou bann dimoun ki aksepte piblikasyon oubyen ki montre lentere dan sa bon nouvel? Eski nou kontinyen fer zefor pour ed zot progrese spirityelman? Vi ki lavi dimoun i enplike, nou devret rod fason pour devlop lentere tou dimoun ki nou rankontre.
3. Ki nou devret fer apre ki nou’n koz avek en dimoun dan predikasyon?
3 Pandan ki en konversasyon i ankor fre dan ou lespri, pran en moman pour ekrir son non, ladres ek telefonn si posib. Ekrir size ki ou’n koz lo la, bann verse ki’n ganny lir, ek piblikasyon ki’n ganny plase. Apre sa, pa oubliye pour retourn vwar sa dimoun oplivit posib.
4. Ki mannyer nou kapab fer bann retourn vizit efikas?
4 Konman pour fer en Retourn Vizit: Ler ou pe fer en retourn vizit, i byen pour amikal e zantiy e pour montre lentere senser dan sa dimoun. Diskit lo en size dan Labib e gard sa diskisyon senp. Prepar en size dan Labib ki pou enteres sa dimoun pour koz lo la, e alafen sa vizit, demann en kestyon ki kapab ganny reponn lo prosenn vizit. I byen pour evite argimant lo bann size ki pa baze lo Labib ki sa dimoun i kapab eksprimen. Esey servi en keksoz ki zot tou le de zot dakor konman en baz, anmezir ki ou ansenny sa dimoun plis laverite Labib.—Kol. 4:6.
5. Ki zefor en pionye ti fer, e ki rezilta i ti gannyen?
5 Fer retourn vizit i demann zefor, me rekonpans i satisfezan. En pionye an Zapon ti etablir en lobzektif pour fer plis retourn vizit sak mwan. I ti konmans gard en lalis tou bann dimoun ki i ti rankontre port an port, e apre dan lespas set zour, i ti vizit zot ankor. I ti byen prepar sa ki i pou dir e fer son predikasyon avek konfyans total dan sa mesaz ki i ti pe anmennen. Pandan enn son vizit, i ti kapab konmans en letid avek en dimoun ki ti dir: “Mon’n toultan pous zot devan mon laport. I fer premye fwa ki mon ekout zot mesaz.” Vi ki sa pionye ti kontinyen fer zefor, sa in fer li ganny bann bon rezilta. Alafen son premye mwan, i ti ganny dis letid Labib.
6. Akoz nou bezwen persiste pour fer retourn vizit?
6 Sitiasyon bann dimoun pe toultan sanze. (1 Kor. 7:31) Souvan nou bezwen fer plizyer vizit pour trouv en dimoun enterese kot son lakour ankor. Ler nou fer bann retourn vizit, nou kapab ed bann ki annan sa bon latitid pour vin lo semen ki anmenn ver lavi eternel.—Mat. 7:13, 14.