Ki nou Predikasyon i akonpli?
1. Ki mannyer Zeova i vwar nou predikasyon, e ki mannyer dimoun i reazir?
1 Parol Bondye i dir ki bann Kretyen pe mars avek sikse dan servis Zeova, konmsi zot dan en laprosesyon laviktwar. (2 Kor. 2:14-16) Anmezir nou fer lezot konn Bondye, nou predikasyon i parey lansan ki pe fer plezir Zeova. Serten dimoun i ganny atire anver sa bon nouvel; lezot i rezet li. Me reaksyon negatif lamazorite dimoun pa vedir ki nou travay napa sikse. Egzaminen ki nou predikasyon i akonpli.
2. Ki nou predikasyon i fer nou montre?
2 Glorifye Zeova: Satan i argimante ki imen i servi Zeova pour bann rezon egois. (Zob 1:9-11) Predikasyon i donn nou loportinite pour montre ki nou devosyon anver Bondye i senser. Bokou proklanmater i kontinyen obeir sa lord pour prese e pour fer disip malgre zot sitiasyon difisil oubyen dimoun pa enterese. En tel perseverans avek fidelite i fer leker Zeova rezwir!—Prov. 27:11.
3. Akoz i tre enportan pour nou kontinyen fer konnen non Bondye ek son plan?
3 Anplis ki sa, nou predikasyon i zwe en rol dan lakonplisman plan Bondye. An rapor avek destriksyon lemonn Satan ki pe vini, Zeova i dir: “Bann nasyon pou bezwen konnen ki mwan mon Zeova.” (Ezek. 39:7) Pour bann nasyon konnen, i tre enportan ki bann serviter Bondye i kontinyen fer konnen son non ek plan avek “tou nasyon, tribi, lalang ek pep.”—Rev. 14:6, 7.
4. Dan ki fason predikasyon i en baz pour zizman?
4 En Baz pour Zizman: Predikasyon sa bon nouvel i osi en baz pour zizman. Zapot Pol ti dir ki Zezi Kri pou tir vanzans “lo bann ki pa konn Bondye ek bann ki pa obei [bon nouvel] ki konsern nou Senyer Zezi.” (2 Tesa. 1:8, 9) Dimoun pou ganny zize dapre zot fason azir anver sa bon nouvel. Pa sa i en gro responsabilite lo bann serviter Bondye! Pour nou pa responsab pour lavi lezot, nou pa devret arete fer konnen sa mesaz Rwayonm ki sov lavi.—Akt 20:26, 27.
5. Ki mannyer mizerikord Bondye i ganny reflekte dan nou predikasyon?
5 Zefor ki nou kontinyen fer pour ed nou bann vwazen ganny faver Bondye i demontre mizerikord Zeova. (1 Tim. 2:3, 4) Vi ki nou konnen ki lavi dimoun pe toultan sanze, nou kontinyen al kot zot e ankouraz zot pour rod Zeova pandan ki i ankor annan letan. Ler nou fer sa, nou reflekte “konpasyon nou Bondye,” ki “pa oule ki personn i ganny detri, me ki tou dimoun i arive repanti.”—Lik 1:78; 2 Pyer 3:9.
6. Dan ki fason nou benefisye ler nou reste okipe dan servis Zeova?
6 Nou menm nou benefisye: Ler nou reste okipe dan servis Zeova, sa i protez nou. I ed nou gard antet “zour” Zeova e evite ganny sali avek sa lemonn mesan ki nou pe viv ladan. (2 Pyer 3:11-14; Tit 2:11, 12) Alors, annou “reste ferm e solid. Montre touzour plis lentere dan travay Senyer,” akoz nou konnen ki nou bann zefor dan predikasyon pa anven.—1 Kor. 15:58.