Montre Lentere senser—par demann Kestyon e ekoute
1 Laplipar dimoun i kontan ler zot eksprim zot lopinyon me zot pa kontan ler zis en dimoun i koze oubyen ler zot ganny kestyonnen. Alor konman bann minis Kretyen, nou bezwen aprann konman servi kestyon pour konn pwennvi lezot.—Prov. 20:5.
2 Kestyon ki nou demande i devret fer en dimoun reflesir, non pa fer li per. Ler en frer ti pe pres port an port, i ti demann sa met lakour, “Eski ou krwar pou annan en letan kot dimoun pou tret kanmarad avek dinite ek respe?” Depandan lo sa ki sa dimoun ti reponn, i ti dir, “Kwa ki ou panse i neseser pour sa arive?” oubyen “Akoz ou santi koumsa?” En lot frer ki ti pe donn temwannyaz enformel e osi pres dan bann landrwa piblik ti demann bann ki annan zanfan, “Kwa ki ou pli kontan konman en paran?” Apre i ti demande, “Kwa ki pli trakas ou?” Remarke ki sa bann kestyon i permet sa bann dimoun eksprim zot lopinyon san ki nou fer zot anbarase. Vi ki i annan diferan sitiasyon, kekfwa nou bezwen adapte topik ek fason ki nou demann kestyon dapre dimoun ki nou zwenn.
3 Fer Dimoun eksprim zot: Si bann dimoun i pare pour dir ou sa ki zot panse, pran letan pour ekout zot san enteronp zot kot pa neseser. (Zak 1:19) Remersye zot zantiman pour sa ki zot in dir. (Kol. 4:6) Ou kapab dir: “Sa i enteresan. Mersi pour sa ki ou’n dir mwan.” Felisit zot senserman si ou kapab fer li. Demann zot lezot kestyon zantiman pour ou konnen ki zot panse e akoz zot santi koumsa. Rod bann pwen ki zot tonm dakor lo la. Ler ou anvi atir zot latansyon lo en verse Labib, ou kapab dir, “Eski ou’n deza mazin lo sa?” Evite koz tou ou menm oubyen argimante.—2 Tim. 2:24, 25.
4 Lafason ki lezot i reazir anver nou kestyon i kapab depan en kantite lo lafason ki nou ekoute. Dimoun i kapab konnen si nou pe vreman ekoute. En sirveyan ti fer sa remark, “Ler ou montre ki ou vreman anvi ekout lezot, i fasil pour ganny zot latansyon e i osi en bon fason pour montre lentere senser.” Ler nou ekout lezot nou demontre respe pour zot, e sa i kapab pous zot pour ekout sa bon nouvel ki nou pe anmennen.—Rom. 12:10.