Montre Lentere senser—Par demontre Konpasyon
1 “Zeova i annan konpasyon.” (Ps. 145:8) Menm si i sa Enn pli o dan liniver, i bon, i annan konsiderasyon, e i poli dan lafason ki i azir avek bann imen enparfe. (Zen. 13:14; 19:18-21, 29) Nou kapab amelyor nou prezantasyon sa bon nouvel par imit nou Bondye ki annan konpasyon. (Kol. 4:6) Sa i plis ki zis demontre lapolites ek respe dan nou fason koze.
2 Port an port: Ki nou pou fer si nou vizit en dimoun dan en ler ki pa apropriye oubyen ler i tro okipe pour koz avek nou? Nou bezwen rekonnet sa bann sitiasyon e fer zefor pour gard nou prezantasyon bref oubyen ofer pour retourn en lot ler. Nou evite ensiste ki sa bann dimoun i pran nou piblikasyon si zot pa oule. Konsiderasyon pour lezot pou osi pous nou pour montre respe pour zot propriyete, tel parey ferm zot baro ek laport e osi par montre nou zanfan pour fer parey. Nou devret fer sir ki okenn piblikasyon ki nou kit kot bann lakour kot napa personn i pa ganny vwar par lezot ki pe pase. Konpasyon pou vreman pous nou pour tret lezot zis parey nou ti pou anvi zot tret nou.—Lik 6:31.
3 Dan Semen: Ler nou pe partisip dan temwannyaz lo semen, nou kapab montre lapolites ler nou pa bar lezot dimoun ki pe pase, e osi ler nou pa debout an ta devan laboutik. Nou bezwen rekonnet sitiasyon lezot e koz avek bann ki kapab annan letan pour ekoute olye bann ki pe degaze. Parler, nou bezwen koz en pe for akoz tapaz dan semen. Me nou bezwen fer li avek dinite, e pa atir latansyon lo nou.—Mat. 12:19.
4 Temwannyaz par Telefonn: Konsiderasyon pour lezot pou pous nou pour donn temwannyaz par telefonn dan en landrwa kot napa tapaz. Nou demontre en bon kondwit ler nou entrodwir nou lekor vitman e eksplik rezon ki nou’n telefonnen. Lezot pou kapab fer en bon konversasyon si nou koz direkteman dan telefonn e koz dan en fason amikal. (1 Kor. 14:8, 9) Nou imit Zeova, nou Bondye ki annan konpasyon ler nou bon, annan konsiderasyon, e poli dan plizyer fason.