Let sorti kot Biro Brans Moris

Ser Proklanmater Rwayonm:

Pandan lannen 2006, plizyer frer ek ser in ganny bokou afekte par lepidemi Chikungunya. Bokou parmi zot in demontre zot lafwa ek zot devouman menm si zot ti bezwen fer fas avek sa maladi. Nou’n osi arive ganny serten maksimonm pour premye fwa dan nou travay predikasyon. Par egzanp Moris, Oktob 2005, nou’n ganny 1,542 proklanmater ek 1,470 letid Labib. Mayot, Oktob menm, preski 40 poursan bann proklanmater ti fer pionye, zot ti fer en maksimonm 994 retourn vizit e an Novanm 129 letid Labib. Desanm ti annan en maksimonm 81 proklanmater. Sesel, ti annan en maksimonm 24 pionye asistan pour premye fwa.

Zot pou kontan konnen ki nou’n dedye trwa Lasal Rwayonm ver lafen lannen servis. De ladan ti Sesel, La Digue ek Anse Royale, e enn Moris, Pamplemousses. Nou asire ki sa bann Lasal ki senp me byen zoli, pou ede pour travay predikasyon progrese dan sa bann landrwa. Nou remersye tou bann ki’n donn lanmen pour konplet sa bann proze.—1 Tesa. 5:18.

Vi ki Zeova pa zanmen anvoy son bann zouvriye travay san form zot avan, nou osi kontan pour dir zot ki pandan mwan Zen ek Zilyet, i ti annan de lekol pour bann pionye lo zil Moris. Parey ti ganny anonse, menm bann pionye ki ti’n deza asiste sa lekol ti ganny envite e zot in resevwar nouvo kopi liv pour bann pionye. I pou osi annan de lekol Larenyon okonmansman sa lannen servis.—Iza. 54:13.

Nou asire ki zot kontan nou Papa dan lesyel e ki zot anvi fer son lavolonte. Zot kapab annan lasirans ki dan Betel, nou kontan zot en kantite, e ki nou pa manke toulezour pour priy pour zot tou. Nou kontan pour servi zot pour loue nou Kreater. Nou swete ki Zeova nou Bondye i kontinyen beni zot devouman, zot landirans dan difikilte ek lanmour ki zot demontre anver li.

Zot bann frer,

Biro Brans Moris