Imit Kris dan ou Travay Predikasyon
1 Zezi ti kit en legzanp pour nou swiv dan nou travay predikasyon. Son profon lanmour pour Bondye ek dimoun ti ganny demontre dan plizyer lokazyon e dan plizyer fason. I ti ansenny bann dimoun ki ti annan limilite e i ti fer bann keksoz ki ti demontre son labonte leker pour bann ki ti aflize e bann ki ti ganny oprimen.—Mat. 9:35.
2 Legzanp ek Lansennyman Zezi: Zezi pa ti les li ganny distrer par angaz li dan bann zafer politik oubyen bann zefor imaniter pour amelyor kominote. I pa ti les ni menm lezot keksoz ki ti kapab bon distrer li oubyen anpes li fer son travay pli enportan. (Lik 8:1) I ti fikse son latansyon lo pres sa bon nouvel lo Rwayonm Bondye konman sa sel solisyon permanan pour problenm limanite. Zezi ti annan en travay enportan pour fer e en pti gin letan pour fer li. Ler bann dimoun dan Kapernaoum ti anvi Zezi i reste laba, i ti dir son bann disip: “Annou al dan bann vilaz dan zalantour pour ki mon a kapab pres Levanzil laba osi; se pour sa rezon ki mon’n vini.”—Mark 1:38.
3 Apre ki i ti’n form zot, Zezi ti anvoy zot pour al prese avek sa bann lenstriksyon spesifik: “Prese ki, ‘Rwayonm lesyel i pros!’” (Mat. 10:7) I ti ansenny son bann disip ki lentere Rwayonm i devret premye dan zot lavi. (Mat. 6:33) Bann dernyen parol Zezi avan i ti mont dan lesyel ti fer kler ki zot ti devret fer. I ti dir: “Ale e fer tou pep vin mon bann disip.”—Mat. 28:19.
4 Lenportans Rwayonm: Topik enportan ki Zezi ti diskit lo la ti Rwayonm Bondye, e i ti ankouraz son bann disip pour swiv son legzanp. Bann zefor imen pour rezoud bann problenm zonm pa pou reisi. (Zer. 10:23) Zis Rwayonm Bondye ki pou sangtifye non Bondye e anmenn en soulazman permanan pour limanite. (Mat. 6:9, 10) Ansenny laverite lo Rwayonm avek bann dimoun ki pe “zemir e plennyen akoz sa bann move keksoz ki pe arive” i ed zot viv ere, reisi dan lavi la konmela e tenir ferm sa vre lespwar pour lavenir.—Ezek. 9:4.
5 Zezi pe kontinyen zwe en rol aktif pour ki sa bon nouvel Rwayonm Bondye i ganny prese, e i asir nou ki i donn nou son siport. (Mat. 28:20) Ziska ki degre nou travay predikasyon i kapab ganny konpare avek sa model ki Zezi in kit pour nou? (1 Pyer 2:21) Dan sa bann dernyen zour enportan, annou fer tou sa ki nou kapab pour swiv legzanp ki Zezi ti kite dan predikasyon!