Minister Kretyen i nou Travay prensipal
1 Nou tou nou annan diferan kalite travay ki nou bezwen fer. Bondye in demann nou pour pran swen avek nou lakour. (1 Tim. 5:8) Me pran swen avek nou lakour pa devret vin pli enportan ki travay predikasyon Rwayonm e fer disip.—Mat. 24:14; 28:19, 20.
2 Zezi in donn nou en legzanp pour swiv, pour “rod plito Rwayonm Bondye.” (Mat. 6:33; 1 Pyer 2:21) Menm si i ti annan en pti gin lo plan materyel, i ti konsantre antyerman lo fer lavolonte son Papa. (Lik 4:43; 9:58; Zan 4:34) I ti fer en kantite zefor pour donn en temwannyaz sak loportinite ki i ti gannyen. (Lik 23:43; 1 Tim. 6:13) I ti ankouraz son bann disip pour annan sa menm lentere dan travay rekolt.—Mat. 9:37, 38.
3 Imit Zezi ozordi: Nou kapab imit legzanp Zezi par esey viv en lavi senp ki santre lo minister Kretyen. Si nou annan bann keksoz ki nou bezwen pour viv, annou ekout sa konsey Labib pour pa al rod plis keksoz dan sa lemonn. (Mat. 6:19, 20; 1 Tim. 6:8) Pa i pli bon pour rode konman nou kapab fer plis dan travay predikasyon! Si nou rankontre bann sitiasyon difisil, annou fer zefor parey Zezi ti fer, e pa les bann traka lavi vin pli enportan ki nou travay prensipal pour anons sa bon nouvel Rwayonm.—Lik 8:14; 9:59-62.
4 Menm bann ki annan en kantite responsabilite i donn priyorite travay predikasyon. En frer ki annan en gran fanmiy, en travay ki demann bokou, e ki en ansyen dan kongregasyon, i dir: “Mon konsider minister konman mon karyer.” En ser pionye i dir: “Fer pionye i vo plis ki en bon karyer dan lemonn.”
5 Nenport ki sitiasyon nou ladan, annou swiv legzanp Zezi. Konman? Par fer minister Kretyen vin nou travay prensipal.