Ki ou Priyorite?
1 Bokou lorganizasyon relizye i met lanfaz lo fer bann travay saritab, tel parey fourni bann fasilite pour ledikasyon oubyen bann bezwen medikal. Me Temwen Zeova, kantmenm zot pa oubliye pour “fer dibyen e ed kanmarad,” zot donn priyorite pour ed lezot spirityelman.—Ebr. 13:16.
2 Legzanp premye Syek: Zezi ti fer bokou bon travay pandan son minister lo later, me rann temwannyaz lo laverite ti son travay prensipal. (Lik 4:43; Zan 18:37; Akt 10:38) I ti komann son bann disip pour ‘ale e fer tou pep vin son bann disip. . . . Ansenny zot.” (Mat. 28:19, 20) I ti osi fer resorti ki bann ki demontre lafwa dan li pou akonpli sa travay ki i’n konmanse lo en pli gran lesel. (Zan 14:12) Zezi ti donn priyorite travay predikasyon, akoz sa i ed dimoun aprann fason pour ganny sove.—Zan 17:3.
3 Zapot Pol ti vwar son aktivite predikasyon konman en “lobligasyon,” en nesesite ki i pa ti kapab inyore. (1 Kor. 9:16, 17) I ti pare pou fer nenport sakrifis, andir nenport leprev, oubyen siport nenport difikilte ki neseser pour li kapab akonpli son minister. (Akt 20:22-24) Zapot Pyer avek son bann konpanyon ti demontre menm leta lespri. Menm kan zot ti ganny anprizonnen e ganny bate, “zot ti kontinyen prese dan Tanp ek dan bann lakaz e anons Zezi konman Mesi.”—Akt 5:40-42.
4 Me nou? Eski nou donn priyorite sa travay pour proklanm bon nouvel Rwayonm e pour fer disip? Parey Zezi, eski nou vreman enterese avek bann ki “fatige e dekouraze parey bann mouton ki napa berze”? (Mat. 9:36) Bann levennman lemonn ki pe arive ek profesi Labib i klerman montre ki letan pe fini pour sa lemonn mesan! Si nou gard klerman antet lenportans travay predikasyon, sa pou pous nou pour kontinyen pres avek devouman.
5 Evalye ou Sitiasyon: Vi ki sitiasyon personnel i souvan sanze, i byen si tanzantan nou egzaminen si nou kapab fer bann sanzman pour fer plis dan travay predikasyon. En ser ki ti’n deza fer pionye ordiner pandan bann lannen 50, 60 ek 70 ti plitar vwar li neseser pour li arete akoz problenm lasante. Me avek letan, son lasante ti amelyore. I ti resaman reevalye son sitiasyon e realize ki i pou kapab fer pionye ankor. I ti vreman kontan pour asiste Lekol Servis Pionye alaz 90 an! Me ou? Eski ou pros pour pran retret oubyen fini lekol? Kan ou sitiasyon in sanze, eski ou pou kapab fer pionye?
6 Ler Zezi ti vwar ki Mart “ti pe fatige avek bann diferan servis lakwizin,” i ti zantiman sizere ki i pou resevwar pli gran benediksyon si i gard keksoz senp. (Lik 10:40-42) Eski ou kapab senplifye ou fason viv? Eski i vreman neseser ki tou le de, mari ek madanm i anploye? Si zot fer bann sanzman, eski lafanmiy i kapab viv lo zis en reveni? Bokou in benefisye spirityelman par fer bann sanzman pour kapab fer plis dan minister.
7 Fotespere ki nou tou nou swiv legzanp ki Zezi ek bann zapot in kite! Nou pou sirman resevwar benediksyon Zeova pour nou bann zefor senser ki nou’n fer pour partisip plennman dan sa travay enportan pour pres bon nouvel Rwayonm.—Lik 9:57-62.