Nou priyorite
1. Ki mannyer Zezi ti demontre ki predikasyon ti enportan pour li?
1 Pour Zezi predikasyon ti sa aktivite pli enportan. I ti travay dir e mars en kantite pour pres avek otan dimoun posib Palestin. I ti gard son lavi senp pour li kapab dedye tou son letan ek latansyon dan predikasyon. (Mat. 8:20) Letan lafoul ti esey fer li reste pour li geri bann dimoun malad, i ti dir: “Mon bezwen anons Bonn Nouvel konsernan Rwayonm Bondye dan bann lezot lavil osi, parski se pour sa, ki Bondye in anvoy mwan.”—Lik 4:43.
2. Akoz predikasyon ti sitan enportan pour Zezi?
2 Akoz predikasyon ti sitan enportan pour Zezi? Akoz i ti vreman anvi sanktifye non Zeova. (Mat. 6:9) I ti kontan son Papa ki dan lesyel e alor i ti anvi akonplir Son lavolonte e obeir tou Son bann komannman. (Zan 14:31) An plis ki sa, i ti vreman enterese avek bann dimoun e i ti anvi ed zot.—Mat. 9:36, 37.
3. Ki mannyer nou kapab demontre ki predikasyon i annan premye plas dan nou lavi?
3 Imit Zezi: I kapab difisil pour nou fer sa travay predikasyon vin en priyorite dan nou lavi parey Zezi akoz sa lemonn i demann bokou nou letan e i ofer bokou distraksyon. (Mat. 24:37-39; Lik 21:34) Alor, nou bezwen verifye sa ki pli enportan par organiz nou letan pour prepar byen e partisip dan predikasyon regilyerman. (Fili. 1:10; NW) Nou pou anvi fer bokou zefor pour viv en lavi senp e evite servi sa lemonn o maksimonm.—1 Kor. 7:31.
4. Akoz i enportan pour nou kontinyen gard nou minister konman en priyorite la konmela menm?
4 Kan letan i limite, en dimoun ki saz i fer sa ki pli enportan premye. Si par egzanp i tande ki en tanpet ki danzere pe vini, i pou depans son letan ek lenerzi pour fer sir ki son fanmir i an sekirite e i pou averti son bann vwazen. Bann aktivite ki pa sitan enportan pou kapab espere. Letan ki reste avan tanpet Armagedon i vini i pli kourt. (Tsef. 1:14-16; 1 Kor. 7:29) Pour nou kapab sov nou lekor ek bann ki ekout nou, nou bezwen kontinyelman vey byen nou lekor e fer byen atansyon avek nou lansennyman dan kongregasyon oubyen an deor. (1 Tim. 4:16) Wi, nou bezwen kontinyen gard nou minister konman en priyorite pour nou kapab ganny sove!