Ki ou pou fer avek ou Lavi?
1 Parfwa bann zanfan i ganny demande, “Ki ou anvi vini ler ou gran?” Ler ou ti ankor en pti garson, eski ou ti anvi vin en pilot? en ansyen? en sirveyan rezyonal? Oubyen ler ou ti ankor en pti fiy, eski ou ti anvi vin en danser bale? en ners? en misyonner? Aprezan vi ki ou’n gran, ou bezwen demann ou lekor en lot kestyon, ‘Ki mon pou fer avek mon lavi?’ Eski ou’n pare pour deside?
2 Pour ed ou fer sa pli bon desizyon, lorganizasyon Zeova in prodwi en DVD Young People Ask—What Will I Do With My Life? Get sa DVD silvouple, e mazin seryezman lo tou sa ki i annan lo la, ki enkli sa film, bann entervyou, ek lezot lenformasyon siplemanter. Bann konteni sa DVD i trouve dan bwat “Main Menu.” kot ou kapab swazir sa seksyon ki ou anvi gete.
3 Film: Anmezir ou get sa film, reflesir lo sa bann kestyon: (1) Ki Timote, ki ganny mansyonnen dan Lekritir Grek, i annan an komen avek Andre? (Akt 16:1; 1 Tim. 4:8; 2 Tim. 1:5) (2) Ki mannyer Andre ti pe ganny met anba presyon pour fer pli byen dan atletik, e par lekel? (3) Lekel ki ti annan en bon lenfliyans lo Timote e lo Andre, e dan ki fason? (2 Tim. 1:1-4; 3:14, 15) (4) Ki lefe sa konsey dan Matye 6:24 ek Filipyen 3:8 ti annan lo Andre, e ki lefe i annan lo ou?
4 Bann senn ki ganny selekte: Apre ki ou’n get sa film an antye, rezwe sa bann senn, e reponn sa bann kestyon. “Pol ek Timote”: Ki dernyen konsey Pol ti donn Timote? (2 Tim. 4:5) “Donn Zeova ou Meyer”: Ki lobzektif spirityel ou annan? “Pran pozisyon pour Zeova”: Kwa ki anmenn vre lazwa? “Konsey Granmanman”: Ki annan mal avek anvi vin renonmen dan lemonn Satan? (Mat. 4:9) “Napa Regre”: Kwa ki kapab ed ou trouv vre satisfaksyon dan lavi?—Prov. 10:22.
5 Entervyou: Anmezir ki ou get sak seksyon, ki bann keksoz ou vwar ou kapab fer pour donn Zeova ou meyer? (1) “Dedikasyon pour Keksoz anven oubyen pour Zeova?” (1 Zan 2:17); (2) “Aprann kontan ou Minister.” (Ps. 27:14); e (3) “En Loportinite pour antre dan Servis Aplentan.”—Mat. 6:33.
6 En Refleksyon lo lepase: Eski ou kapab reponn? (1) Ki karyer sa frer ek sa ser ti pe pourswiv e akoz? (2) Ki kantite zot ti’n reisi? (3) Kwa ki ti fer zot sanz zot fason viv? (2 Kor. 5:15) (4) Ki karyer teokratik ki ti ranplas zot karyer avan, e akoz zot ti santi ki zot pa ti pou kapab pourswiv tou le de? (5) Eski zot annan okenn regre lefe ki zot in sanz zot fason viv? (6) Ki zot ti dir ki’n sirtou fer ou reflesir lo sa ki ou devret fer avek ou lavi?
7 Entervyou Siplemanter: Dan sa bann entervyou, kwa ki ou’n aprann ki ou kapab fer pour fer plis dan servis Zeova? (1) “Lenportans en Letid Personnel,” (2) “Lezot form Temwannyaz,” (3) “Servis Betel,” (4) “Lekol Gilead,” ek (5) “Lekol Formasyon Ministeryel.”—Revwar “Lalis Lenformasyon Siplemanter ki relye avek sa ki’n ganny diskite,” e lir plis lo sa ki pli enteres ou.
8 Alors, eski ou’n deside ki ou pou fer avek ou lavi? Pol ti ankouraz Timote: “Pran byen aker sa responsabilite e met tou ou zefor ladan, pour ki tou dimoun i a war ou progre.” (1 Tim. 4:15) Nou ankouraz ou pour fer parey avek sa ki ou’n vwar oubyen tande dan sa DVD. Demann Zeova pour ed ou fer en bon swa ki pou vreman anmenn lazwa ek satisfaksyon dan ou lavi la konmela osi byen ki en lavenir satisfezan e ere.
[Bwat lo paz 6]
MAIN MENU
Zwe film
Senn (11 seleksyon)
Entervyou
Zwe tou
Bann Seksyon (3 seleksyon)
Refleksyon lo Lepase
Lenformasyon Siplemanter
Entervyou siplemanter
Lalis Lenformasyon siplemanter ki relye avek sa ki’n ganny diskite
Lekritir anba Lekran
Bann sourd
Nanryen
Pour kapab swazir enn sa ki ou anvi gete lo menus pez Next ▶, ◀ Back, ek Main Menu.