Nouvo Progranm Zournen Lasanble spesyal

Si nou vwar ouswa antann en lavertisman me nou pa azir, rezilta i kapab katastrofik. I pli enportan pour swiv gidans spirityel ki Zeova i fourni. Sa pou ganny aksantye dan progranm zournen lasanble spesyal pour sa lannen servis ki pe vini. Son tenm i “Fer byen atansyon konman zot ekoute.”—Lik 8:18.

Dan son premye diskour, sa orater viziter pou egzaminen konman sa konsey dan bann premye sapit dan let enspire Pol pour bann Ebre i aplik pour nou ozordi. Dan son diskour final, “Kontinyen port Latansyon lo Lenstriksyon Bondye,” i pou ed tou dimoun pour egzaminen si nou pe vreman ekout Zeova, son Garson, ek ‘lesklav fidel e pridan.’—Mat. 24:45.

Ennde size lo progranm pou benefisye sirtou bann fanmiy. Diskour “Fanmiy ki ekout Parol Bondye san okenn Distraksyon” pou ed nou anpes bann keksoz lemonn touf nou spirityalite. I pou enkli entervyou avek bann ki’n fer sanzman pour zot kapab met bann keksoz spirityel premye. “Ekout atantivman Parol Bondye i fortifye nou bann Zenn,” pou enkli entervyou avek bann zenn ki’n montre zot fidel avek laverite kot lekol, avek zot bann kanmarad, ouswa dan predikasyon. “Bann Zanfan ki ekout Bondye e aprann” pou ed nou pour pa sou estim abilite en zanfan pour aprann. Bann entervyou avek bann zenn manrmay ek zot paran, pou ed nou vwar byenfe ler bann zanfan i ganny formen depi lanfans dan semen Zeova.

Pandan ki Satan pe “tronp lemonn antye,” Zeova pe montre son bann serviter fidel semen ki zot devret marse. (Rev. 12:9; Iza. 30:21) Ler nou ekout son konsey atantivman e ler nou aplik li dan nou lavi avek lobeisans i fer nou saz, ere, e anmenn nou ver lavi eternel.—Prov. 8:32-35.