‘Fer Atansyon konman zot ekoute’

EKOUTE i en fakter enportan pour aprann. I osi kapab enfliyans sans pour en dimoun sirviv. Ler Zeova ti pe prepare pour delivre son pep, anba lesklavaz Lezip, i ti donn lenstriksyon avek Moiz, an retour Moiz ti dir bann ansyen dan pep Izrael sa ki zot devret fer pour sov zot bann premye ne kont lanz lanmor. (Egz. 12:21-23) Bann ansyen ti apre pas sa lenformasyon avek sak lakour. Sa ti ganny fer oralman. Bann dimoun ti bezwen ekout atantivman. Konman ki zot ti reazir? Labib i raporte: “Tou bann garson Izrael ti fer egzakteman sa ki Zeova ti ordonn Moiz ek Aaron. Zot ti fer egzakteman.” (Egz. 12:28, 50, 51) An konsekans, Izrael ti eksperyans en delivrans ekstraordiner.

Ozordi, Zeova pe prepar nou pour en pli gran delivrans. Sirman, lenstriksyon ki i fourni i merit tou nou latansyon. En tel lenstriksyon pe ganny fourni dan bann renyon kongregasyon. Eski ou pe benefisye plennman avek sa bann rasanbleman? Sa pou depan bokou lo konman ki ou ekoute.

Eski ou rapel bann pwen for dan lenstriksyon ki ganny donnen dan renyon? Eski i ou labitid pour, semenn apre semenn, rod bann fason pour aplik dan ou lavi bann lenstriksyon ki ganny prezante oubyen pour partaz avek lezot?

Prepar ou Leker

Pour benefisye plennman avek lenstriksyon ki ganny fourni atraver bann renyon Kretyen, nou bezwen prepar nou leker. Lenportans pour fer sa ti ganny fer resorti par sa ki ti arive pandan renny lerwa Zida, Yeosafat. Yeosafat ti pran en pozisyon ferm pour vre ladorasyon. I “ti retir bann oter ek poto sakre an Zida” e ordonn bann prens, Levit, ek pret pour ansenny Lalwa Zeova avek lepep dan tou lavil Zida. Kantmenm sa, “bann oter zot menm pa ti disparet.” (2 Kron. 17:6-9; 20:33) Ladorasyon bann fo bondye e en kalite form ladorasyon Zeova ki pa ti’n ganny otorize, ki ti ganny pratike lo bann oter, ti’n telman popiler ki zot pa ti ganny retire konpletman.

Akoz sa lenstriksyon ki Yeosafat ti organize, pa ti kapab annan en lenfliyans dirab? Sa resi i kontinyen: “Bann dimoun zot menm pa ti’n ankor prepar zot leker pour Bondye zot zanset.” Zot ti antann me zot pa ti reisi azir an akor. Petet zot ti santi ki al kot tanp an Zerizalenm pour ofer bann sakrifis ti difisil. Antouka, zot leker pa ti’n ganny motive par lafwa.

Pour evite drive e retourn dan sa monn Satan, nou bezwen prepar nou leker pour resevwar lenstriksyon ki Zeova pe fourni ozordi. Konman nou kapab fer sa? En fason enportan se par lapriyer. Nou devret priye pour ki nou aksepte avek rekonesans lenstriksyon divin. (Pson. 27:4; 95:2) Sa pou ed nou apresye zefor ki nou bann frer pe fer, ki kantmenm zot enparfe, zot fer zot disponib pour Zeova servi zot pour ansenny son pep. Sa pou motiv nou pour pa zis remersi Zeova pour bann nouvo keksoz ki nou pe aprann me osi pour loportinite pour agrandi nou lapresyasyon pour bann keksoz ki nou’n deza aprann. Avek sa dezir pour plennman fer lavolonte Bondye, nou priye: “Enstri mwan, O Zeova, konsernan ou semen. . . . Inifye mon leker pour annan lakrent pour ou non.”—Pson. 86:11.

Fikse ou Latansyon

I annan bokou lobstak ki kapab anpes nou ekout atantivman. Petet nou lespri i ranpli avek lenkyetid. Tapaz ek mouvman dan lodyans oubyen an deor Lasal i kapab distrer nou. En problenm lasante i kapab fer li difisil pour nou konsantre. Bann dimoun ki annan pti zanfan i souvan vwar zot pe bezwen okip de keksoz anmenmtan. Kwa ki kapab ed nou pour gard nou latansyon fikse lo progranm?

Sa ki nou fikse nou lizye lo la i domin nou latansyon. Servi nou lizye pour ed nou konsantre par fikse sa orater. Ler i sit en verse Labib—menm si ou konn byen sa verse—rod li, e swiv anmezir ki i lir sa verse. Reziste tantasyon pour vir ou latet dan direksyon tou tapaz oubyen mouvman. Si ou lizye pe ranpli ou lespri avek bann lenformasyon ki distrer, ou pou perdi bokou sa ki pe ganny prezante lo lestrad.

Si okenn “panse troublan” i fer li difisil pour ou konsantre lo progranm, priy Zeova pour trankilite lespri ek leker ki neseser pour port latansyon. (Pson. 94:19; Fili. 4:6, 7) Si i neseser, fer sa plizyer fwa. (Mat. 7:7, 8) Bann renyon kongregasyon i en dispozisyon ki sorti kot Zeova. Ou kapab annan lasirans ki i anvi ou benefisye atraver sa bann renyon.—1 Zan 5:14, 15.

Ekoute pandan bann Diskour

I probab, ki ou kapab rapel bann pwen prefere ki ou’n antann dan bann diskour. Sepandan, ekout en diskour i enplik plis ki zis rapel ennde pwen remarkab. En diskour i parey en vwayaz. Kantmenm i kapab annan bokou keksoz enteresan pour vwar toudilon semen, keksoz pli enportan se son destinasyon, son lobzektif. Sa orater i kapab pe esey anmenn lodyans ver en serten konklizyon oubyen pous zot pour pran serten aksyon.

Konsider sa diskour ki Zozye ti fer avek nasyon Izrael, ki ganny rikorde dan Zozye 24:1-15. Son lobzektif ti pour motiv lepep pran en pozisyon ferm pour vre ladorasyon par konpletman separ zot avek idolatri lezot nasyon zalantour. Akoz sa ti sitan enportan? Popilarite fo ladorasyon ti kree en menas pour gat sa bon relasyon ki sa nasyon ti annan avek Zeova. Lepep ti reazir avek lapel Zozye an dizan: “I enkrwayab, lo nou par, pour kit Zeova pour servi lezot bondye. . . . Nou pou servi Zeova.” E zot ti fer li!—Zoz. 24:16, 18, 31.

Pandan ki ou ekout en diskour, esey konpran son lobzektif. Konsider konman ki bann pwen ki sa orater i fer resorti i kontribye anver lakonplisman sa lobzektif. Demann ou lekor ki sa lenformasyon pe demann ou pour fer.

Ekoute pandan Diskisyon

Letid Latour Veyer, Letid Liv Kongregasyon, ek serten porsyon dan Renyon Servis i ganny kondwir konman diskisyon par kestyon ek repons lo bann lenformasyon baze lo Labib.

Dan serten laspe, ekout en diskisyon i parey ler ou pe partisip dan en konversasyon. Pour benefisye plennman, ekout atantivman. Get byen dan ki direksyon ki diskisyon pe ale. Remarke konman ki sa enn ki pe diriz sa diskisyon i met lanfaz lo tenm ek bann pwen prensipal. Dan ou lespri reponn son bann kestyon. Ekoute kan lezot i eksplik e aplik sa bann lenformasyon. Konsider sa bann lenformasyon dapre pwenn-vi lezot i kapab ed ou pour vwar en pwen ki ou konn byen dan en diferan laliny. Kontribye dan sa lesanz pwenn-vi par eksprim ou prop lafwa.—Rom. 1:12.

Par etidye davans sa bann lenformasyon ki’n ganny dezinyen, sa pou ed ou kapab konsantre lo sa diskisyon e pour port latansyon lo bann komanter ki lezot i fer. Si ou sirkonstans i fer li difisil pour etidye sa bann lenformasyon oprofon, omwen pran detrwa minit pour ganny en lide zeneral lo sa bann lenformasyon avan renyon. Sa pou ed ou pour pli byen benefisye dan sa diskisyon.

Ekoute dan bann diferan Lasanble

Dan bann lasanble, i probab ki i annan bokou plis distraksyon ki dan bann renyon kongregasyon. Sa i kapab fer li vin pli difisil pour nou ekoute. Kwa ki kapab ed nou?

En fakter enportan se pour ganny ase repo aswar. Avan ki progranm i konmanse, fikse byen tenm dan ou lespri sak zour lasanble. Get tit sak diskour, e esey imazin sa ki pou ganny prezante. Servi byen ou Labib. Bokou dimoun i dekouver ki pran bann not bref lo bann pwen prensipal i ed zot pour gard zot lespri fikse lo progranm. Fer not lo lenstriksyon ki ou deside aplik dan ou lavi ek ou minister. Ler ou pe retournen oubyen pe al lasanble sak zour diskit lo detrwa pwen. Sa pou ed ou pour rapel sa lenformasyon.

Form Zanfan pour ekoute

Bann paran Kretyen i kapab ed zot zanfan—menm bann pti zanfan—pour ganny “lasazes ki kondir dan lavi eternel” par anmenn zot bann renyon kongregasyon, ek bann lasanble. (2 Tim. 3:15) Vi ki tou zanfan i diferan an sa ki konsern zot abilite ek letan konsantrasyon, disernman i neseser pour ed zot aprann ekout atantivman. Ou kapab trouv sa bann sizesyon itil.

Dan lakour, organiz bann moman kot ou zanfan i asiz trankilman e lir oubyen get portre dan bann piblikasyon Kretyen. Dan bann renyon, evite servi zouzou pour gard bann zanfan okipe. Parey ti leka dan ansyen Izrael, ozordi osi bann pli pti zanfan i prezan dan bann renyon “afen ki zot kapab ekoute e afen ki zot kapab aprann.” (Det. 31:12) Kan i posib, serten paran i menm donn zanfan kopi piblikasyon ki pe ganny egzaminen. Anmezir ki sa manrmay i grandi, ed zot pour prepar pour partisip dan bann progranm ki demann partisipasyon lodyans.

Labib i revel en relasyon pros ant ekout Zeova e obeir li. Sa i kapab ganny trouve dan bann parol Moiz avek nasyon Izrael: “Mon met lavi ek lanmor devan zot, benediksyon ek malediksyon; e ou devret swazir lavi . . . par kontan Zeova zot Bondye, par ekout son lavwa e par reste atase avek li.” (Det. 30:19, 20) Ozordi, ekout lenstriksyon ki Zeova i fourni e avek lobeisans aplik li dan nou lavi i esansyel pour nou ganny laprouvasyon Bondye ek benediksyon lavi eternel. Konman ki i enportan, alor, ki nou port latansyon lo konsey Zezi: “Fer byen atansyon konman zot ekoute.”—Lik 8:18.