“I pe donn Lafors sa enn ki fatige”
1 Nou tou nou fatige detanzaot. Nou kapab fatige pa zis akoz nou travay oubyen akoz lezot aktivite fizik ki nou fer, me osi akoz bann problenm ki nou fer fas avek dan sa bann “letan difisil.” (2 Tim. 3:1) Konman bann serviter Zeova, ki mannyer nou ganny sa lafors spirityel ki nou bezwen pour anpes nou ralanti dan nou predikasyon? Nou arive fer sa par depan lo sa enn ki “for e pwisan,” Zeova. (Iza. 40:26) I konn nou bann bezwen e i vreman anvi ed nou.—1 Pyer 5:7.
2 Laranzman Zeova: Zeova i donn nou lafors atraver son lespri sen, sa menm lafors pwisan ki i ti servi pour kree liniver. Lespri sen Bondye i ed nou pour “reganny lafors” si nou epwize. (Iza. 40:31) Demann ou lekor, ‘Ki dernyen fwa mon ti presi dan mon lapriyer pour demann lespri sen pour donn mwan lafors pour akonpli mon bann lobligasyon Kretyen?’—Lik 11:11-13.
3 Par lir e reflesi lo Parol Bondye sak zour e ganny nouri spirityelman par regilyerman etidye nou bann piblikasyon Kretyen, nou pou vin parey en zoli “pye dibwa ki’n ganny plante obor bann larivyer, ki raport son fri pandan son sezon e ki son fey pa fletri.”—Ps. 1:2, 3.
4 Zeova i osi servi nou bann frer ek ser Kretyen, ki kapab vin en “led fortifyan” pour nou. (Kol. 4:10, 11, NW) Ler nou al renyon nou ganny fortifye par zot bann konversasyon, komanter, ek diskour ki batir nou. (Akt 15:32) Bann ansyen i sirtou donn led spirityel ek lankourazman ki fortifye nou.—Iza. 32:1, 2.
5 Predikasyon: Si ou santi ki ou pe konmans epwize, pa aret prese! Konpare avek laplipar lezot aktivite, partisip dan predikasyon regilyerman i soulaz nou. (Mat. 11:28-30) Pres sa bon nouvel i ed nou pour konsantre lo Rwayonm Bondye ek lespwar lavi eternel e osi son bann benediksyon merveye.
6 I annan en kantite pour fer avan ki sa lemonn mesan i ganny detrir. Nou annan tou rezon pour nou reste ferm dan nou servis, ‘avek lafors ki Bondye i donn nou.’ (1 Pyer 4:11) Avek led Zeova nou pou fini nou travay, parski “i pe donn lafors sa enn ki fatige.”—Iza. 40:29.