Kwen Kestyon

◼ Ki danze i annan pour servi Internet pour asosye avek en dimoun ki nou pa konnen?

I annan bokou sit Internet ki’n ganny fer pour dimoun zwenn e kominik avek kanmarad. Bokou sa bann sit i permet bann endividi pour kree e pibliy zot prop profil, ki kapab enkli portre ek lezot lenformasyon personnel. Dimoun ki vwar sa profil i kapab kontakte zot. Bann sit koumsa i tre popiler parmi zenn, e serten zenn dan kongregasyon in servi sa bann sit pour kominik avek lezot ki dir zot Temwen Zeova.

I fasil pour en dimoun ki nou fer konnesans avek lo Internet koz lalang konsernan son lidantite, son spirityalite, oubyen son motivasyon. (Ps. 26:4) En dimoun ki dir i en Temwen Zeova i kapab an realite pa en Temwen, en dimoun ki’n ganny ekskli, oubyen menm en dimoun ki’n rezet laverite e ki pe esey fer tonbe bann Kretyen. (Gal. 2:4) Dapre rapor, bokou dimoun ki kontan abiz bann zanfan seksyelman, i servi sa bann sit pour trouv zot viktim.

Menm si nou konvenki ki sa bann ki nou pe kominik avek i annan en bon repitasyon dan kongregasyon, pour kominik avek zot atraver Internet i kapab fasilman diriz ver keksoz ki pa apropriye. Sa i akoz dimoun i tant pour santi zot pli alez pour dir nenport kwa avek en dimoun ki zot pa’n zwenn an personn. Zot kapab osi vwar kominikasyon lo Internet konman en keksoz ki prive e santi ki nenport keksoz ki zot dir, lezot parey zot paran oubyen ansyen pa pou okouran. I fer lapenn pour vwar ki serten zenn dan fanmir Kretyen in tonm dan sa latrap e zot in servi langaz obsenn. (Efe. 5:3, 4; Kol. 3:8) Lezot in enkli zot prop portre ki provok lezot seksyelman, bann pti non sal, oubyen zot enkli lanmizik ki demontre bann aksyon seksyel degradan dan zot profil.

An rapor avek sa ki pe arive, paran i devret vey lafason ki zot zanfan i servi konpiter. (Prov. 29:15) I ti pou danzere pour envit en dimoun ki nou pa konnen kot nou oubyen pour kit li tousel avek nou zanfan. Pareyman, i danzere pour nou oubyen nou zanfan, fer zanmi avek dimoun ki nou pa konnen lo Internet, menm si zot dir zot Temwen Zeova.—Prov. 22:3.