Nou bann privilez i annan gran valer pour nou!
1 Tou dilon legzistans imen, Zeova in ofer son bann serviter en kantite diferan privilez. I’n donn zot bann privilez san pran kont zot laz, pozisyon dan lasosyete oubyen si zot msye oubyen madanm. (Lik 1:41, 42; Akt 7:46; Fili. 1:29) Ki privilez i ofer nou ozordi?
2 Serten nou bann privilez: Nou annan sa privilez pour ganny ansennyen par Zeova. (Mat. 13:11, 15) En lot privilez ki nou kontan, i ler nou loue Zeova par nou komanter ki nou fer pandan renyon. (Ps. 35:18) Ler nou ganny en loportinite pour fer komanter, nou fer li avek lantouzyasm. Pareyman, si sak travay ki nou ganny demande pour fer dan kongregasyon nou vwar li konman en privilez, nou pou fer tou sa ki nou kapab pour fer li byen. Eski nou partisip regilyerman dan sa travay privilezye pour gard Lasal Rwayonm prop e dan en bon leta?
3 Menm si bokou dimoun i demande si Bondye i ekout zot lapriyer, nou nou konnen ki sa pli gran personnaz dan liniver i ekout nou lapriyer, e sa i en privilez ki nou vreman apresye. (Prov. 15:29) Zeova i personnelman ekout lapriyer son bann serviter. (1 Pyer 3:12) I pa met okenn restriksyon lo ki kantite fwa nou kapab apros li dan lapriyer. Pa sa i en kado presye pour nou kapab priy “dan tou sirkonstans”!—Efe. 6:18.
4 “Travay ansanm pour Bondye”: Enn nou pli gran privilez i pour anons sa bon nouvel Rwayonm Bondye konman bann ki pe “travay ansanm pour Bondye.” (1 Kor. 3:9) Sa i en travay ki anmenn satisfaksyon e donn nou lafors. (Zan 4:34) Zeova pa bezwen imen pour akonpli son travay, me i’n donn nou sa travay akoz i kontan nou. (Lik 19:39, 40) An fezan sa, Zeova pa’n donn sa privilez zis avek nenport ki dimoun. Tou dimoun ki partisip dan sa travay predikasyon i devret annan e mentenir serten kalifikasyon spirityel. (Iza. 52:11) Eski nou montre ki sa privilez i annan en gran valer pour nou par fer sa travay predikasyon form en par enportan dan nou progranm lasemenn?
5 Bann privilez ki sorti kot Zeova i anmenn en kantite benediksyon. (Prov. 10:22) Pa zanmen pran zot alalezer! Par montre ki nou bann privilez pour servi Zeova i vreman presye pour nou, nou fer plezir nou Papa dan lesyel, sa Enn ki donn “tou don ekselan, tou kado parfe.”—Zak 1:17.