Pres lo Rwayonm i en Privilez presye
1 Toulezour, plizyer bilyon dimoun lo sa later i benefisye avek bann provizyon ki Zeova i donnen avek zenerozite. (Mat. 5:45) Me en pti gin dimoun ki annan sa privilez spesyal pour montre lapresyasyon pour zot Kreater par pres sa bon nouvel lo Rwayonm Bondye. (Mat. 24:14) Ki kantite ou apresye sa zoli privilez?
2 Pres lo Rwayonm i onor Bondye e i anmenn lespwar ek lape pour bann dimoun ki trouble par sa letan difisil ki nou pe viv ladan. (Ebr. 13:15) Pour bann ki byen reazir anver sa mesaz, zot ganny lespwar lavi eternel. (Zan 17:3) Eski i annan en travay dan sa lemonn ki ofer bann tel byenfe? Zapot Pol ti montre lapresyasyon pour son minister par lafason ki i ti akonpli li. I ti vwar li konman en trezor.—Akt 20:20, 21, 24; 2 Kor. 4:1, 7.
3 Lapresyasyon pour nou Privilez presye: En fason ki nou montre lapresyasyon pour sa privilez pour prese, se ler nou port latansyon lo kalite nou servis. Eski nou pran letan pour prepar en prezantasyon ki pou tous leker bann ki ekout nou? Eski nou kapab amelyor nou abilite pour servi bann verse Labib e pour rezonn avek dimoun? Eski nou travay oprofon dan teritwar ki nou’n ganny dezinyen? Eski nou kapab konmans e kondwir en letid Labib? Parey bann Kretyen fidel dan lepase e konmela, en bon pwennvi lo sa aktivite i motiv nou pour al prese, e nou apresye nou privilez.—Mat. 25:14-23.
4 Ler nou pe fer fas avek lavyeyes, move lasante, oubyen lezot sitiasyon difisil, i rekonfortan pour konnen ki nou bann zefor pour partisip dan predikasyon avek devouman i vreman ganny apresye. Parol Bondye i asir nou ki Zeova i apresye bann zefor ki nou fer pour servi li, menm bann zefor ki pa paret en gran keksoz pour lezot.—Lik 21:1-4.
5 Pres lo Rwayonm i donn bokou satisfaksyon. En ser 92 an ti dir: “I vreman en privilez pour get sa plis ki 80 lannen ki’n mon’n dedye dan servis Bondye, e pa santi okenn regre! Si mon ti pou reviv mon lavi ankor, mon ti pou viv sa menm lavi, akoz vreman, ‘labonte leker Bondye i pli meyer ki lavi li menm.’” (Ps. 63:3) Nou osi, annou apresye sa travay pour pres lo Rwayonm ki en privilez presye sorti kot Bondye.