Kontan sa privilez ki ou’n gannyen pour al prese
1. Ki bokou dimoun i panse ler zot war nou pe prese?
1 Bokou dimoun dan lemonn i vwar li “en lafoli” ki nou al prese. (1 Kor. 1:18-21) Si nou pa fer atansyon sa fo rezonnman i kapab dekouraz nou e diminyen nou devouman. (Prov. 24:10; Iza. 5:20) Konman Temwen Zeova, kwa ki fer nou kontan sa privilez ki nou annan pour al prese?—Iza. 43:10.
2. Akoz nou dir predikasyon i en “servis sakre”?
2 En “servis sakre”: Zapot Pol ti refer avek predikasyon konman en “servis sakre.” (Rom. 15:15, 16) Dan ki fason predikasyon i en “servis sakre”? Kan nou partisip dan predikasyon nou “pe travay ansanm” avek Zeova, sa Enn ki “sen” e pe kontribye pour sanktifye son non. (1 Kor. 3:9; 1 Pyer 1:15) Nou partisipasyon dan predikasyon i “rann glwar” Zeova, alor nou predikasyon i en laspe enportan nou ladorasyon.—Ebr. 13:15.
3. Kwa ki fer li en gran loner pour anons sa bon nouvel?
3 Napa bokou dimoun ki’n ganny sa gran loner pour pres sa bon nouvel. Menm bann lanz ti pou kontan fer sa travay e nou asire ki zot ti pou fer li vreman byen. (1 Pyer 1:12) Me pa i en gran privilez ki Zeova in swazir nou bann imen enparfe ki parey “bann vaz later” pour fer sa gran travay!—2 Kor. 4:7.
4. Ki mannyer nou kapab demontre ki nou vreman kontan predikasyon?
4 En priyorite: Vi ki nou vreman kontan nou privilez pour prese, predikasyon i vin enn sa bann keksoz “ki pli enportan” dan nou lavi. (Fili. 1:10, NW) Se pour sa rezon ki nou fer letan sak semenn pour partisip dan predikasyon. En mizisyen i montre ki i vreman kontan son privilez ki i’n gannyen pour zwe dan en lorkes ki byen renonmen par prepar byen pour sak performans e travay dir pour devlop son talan. I parey pour nou. Nou pou bezwen prepare avan ki nou al prese pour nou kapab “anons byen mesaz laverite” e pour amelyor nou “lar pour ansennyen.”—2 Tim. 2:15; 4:2, NW.
5. Lekel ki kontan ler nou al prese?
5 Pa bezwen les sa ki laplipar dimoun i panse dekouraz ou. Toultan mazinen ki i annan ankor bokou dimoun dan nou teritwar ki apresye nou vizit. Nou, nou pa pe esey rod laprouvasyon bann dimoun me sa ki pli enportan se lafason ki Zeova i santi e i definitivman apresye en kantite zefor ki nou pe fer.—Iza. 52:7.