Nou’n ganny konfye avek en Trezor
1 Zapot Pol ti kontan son travay ki Bondye ti donn li e i ti apel li en “trezor.” (2 Kor. 4:7) I ti pas atraver difikilte ek persekisyon ler i ti pe fer sa travay. San arete i ti pres avek nenport ki dimoun ki i ti zwenn. I ti fer en kantite vwayaz difisil e danzere lo later ek lanmer. Ki mannyer nou kapab imit Pol e montre ki nou apresye nou travay predikasyon? (Rom. 11:13) Kwa ki fer nou minister en trezor ki pa kapab ganny konpare?
2 En Trezor ki siperyer: Souvan bann trezor lo later i anmenn en kantite latet fer mal e bann benefis ki i anmennen i pa bokou oubyen i tanporer. De lot kote, nou travay predikasyon i anmenn bann benefis dirab pour nou ek lezot. (1 Tim. 4:16) I ed bann dimoun senser aprann konn Zeova, fer bann sanzman neseser dan zot lavi, e donn zot en vre lespwar pour ganny lavi eternel. (Rom. 10:13-15) Ler nou vwar nou travay predikasyon konman en keksoz ki annan gran valer, i donn nou en bi satisfezan dan nou lavi, i fer nou santi ki nou’n akonpli en keksoz ki pou dire, e i ogmant nou lespwar pour lavenir.—1 Kor. 15:58.
3 Demontre ki ou Trezor i annan Valer pour ou: Nou montre ki kantite valer en keksoz i annan pour nou par montre ki kantite nou pare pour sakrifye pour sa keksoz. Pa sa i en privilez pour servi nou letan ek lenerzi pour loue Zeova! (Efe. 5:16, 17) Lafason ki nou depans nou letan i devret montre ki bann keksoz spirityel i annan plis valer ki keksoz materyel. Vi ki nou annan en keksoz ki telman presye pour partaze, nou devret pres avek lantouzyasm e vey tou loportinite pour anons sa bon nouvel.
4 Bann trezor ki annan en kantite valer normalman pa ganny kasyet me okontrer i ganny montre pour lezot vwar. Si nou konsider nou travay predikasyon konman en trezor, i pou fasilman ganny remarke dan nou lavi. (Mat. 5:14-16) Avek en leker ki deborde avek lapresyasyon, annou touzour imit zapot Pol e profit tou lokasyon pour montre ki vreman nou apresye nou predikasyon parey en trezor.