Ador Zeova an fanmir
1 Dan letan Labib, bann manm fanmir ti fer en kantite keksoz ansanm. Zot ti fer bann louvraz lakour tou le zour e pli enportan zot ti ador Zeova an fanmir. (Lev. 10:12-14; Det. 31:12) Ozordi, dan bokou pei, bann manm fanmir i fer en ptigin keksoz ansanm. Parkont, bann Kretyen i rekonnet lenportans pour fer aktivite an fanmir, sirtou ler in ariv ler pour ador Zeova. Pa i vreman bezwen fer plezir Fondater lafanmir pour vwar bann fanmir pe ador li dan linite!
2 Pres an fanmir: Ler zot travay ansanm pour pres sa bon nouvel i fer fanmir vin pli ini. Pour sa rezon, anplis ki akonpanny lezot dan predikasyon, en ansyen pou osi travay regilyerman avek son madanm ek zanfan. (1 Tim. 3:4, 5) Menm si zot progranm i byen sarze, bann sirveyan rezyonal i fer letan pour travay avek zot madanm dan predikasyon.
3 Bann paran ki travay avek zot zanfan i kapab ed zot progrese konman proklanmater. Bann zanfan pa pou zis remark lazwa ek satisfaksyon ki zot paran i gannyen dan predikasyon, me zot pou osi vwar zot paran eksprim zot prop lanmour pour Zeova e pour zot prosen. (Det. 6:5-7) Anmezir ki zanfan kot lakour i vin pli gran, paran pa devret vwar li mwen enportan pour zot pres avek zot zanfan. En koup avek trwa garson aze ant 15 a 21 an i kontinyen akonpanny zot dan predikasyon regilyerman. Zot papa ti dir: “Sak fwa, nou ansenny zot en keksoz. E nou fer sir ki i en leksperyans ki gou e ankourazan.”
4 Fer preparasyon ansanm: Bann fanmir i vwar li pratik pour zot prepar pour predikasyon ansanm. Bann zanfan i souvan kontan bann sesyon legzersis kot bann manm fanmir i fer sakenn son tour en prezantasyon oubyen vin en met lakour. Serten apre letid fanmir i pran detrwa minit pour zot fer sa legzersis.
5 Nou lazwa i ogmante ler nou fer bann keksoz ki enportan e satisfezan avek dimoun ki nou kontan. Pa i gou ler bann manm fanmir i travay ansanm dan predikasyon portanport osi byen ler zot fer retourn vizit e kondwir letid Labib ansanm! Anmezir ou ador Zeova avek ou fanmir, ou kapab avek lazwa dir: “Mwan ek mon fanmir, nou pou servi Zeova.”—Zoz. 24:15.