Nouvo progranm lasanble rezyonal

Zeova i merite ganny glorifye. Ki mannyer nou glorifye Zeova? Kwa ki fer li difisil pour serten glorifye Zeova? Ki benediksyon bann ki glorifye Zeova i gannyen konmela? Progranm lasanble rezyonal pour lannen servis 2008 pou donn bann larepons satisfezan pour sa bann kestyon. Son tenm i “Fer tou pour laglwar Bondye.” (1 Kor. 10:31) Konsider sa ki’n ganny prepare pour nou pandan sa de zour ki pe vini, ki pou ris avek lenstriksyon spirityel.

Sirveyan distrik pou koz lo sa bann size “Akoz donn Bondye laglwar?” e “Vin en legzanp pour fer sa ki Bondye i ekspekte nou fer.” I pou donn diskour piblik, “Lekel sa bann dimoun ki glorifye Bondye?,” e diskour final, “Atraver lemonn nou pe glorifye Bondye dan linite.” I pou osi kondwir Lekol Minister Teokratik. Sirveyan rezyonal pou koz lo sa bann tenm “Pran plezir pour reflekte laglwar Bondye,” “Egzamin bann bezwen dan nou rezyon,” e “Reste ‘byen etablir dan laverite,’” ki baze lo 2 Pyer 1:12. An plis, nou pou aprann ki mannyer “Servis pionye i glorifye Bondye.” “Glorifye Bondye dan tou laspe nou lavi,” i premye parmi sa de diskour an plizyer parti ki fer reflesir bokou. I pou egzamin oprofon sinifikasyon sa parol enspire trouve dan 1 Korentyen 10:31. Sa diskour an plizyer parti “Rann en servis sakre pour loue Zeova,” pou koz lo diferan laspe nou ladorasyon. Nou pou annan en rezimen Latour Veyer ek diskisyon teks pour Dimans. Pou osi annan batenm.

Lamazorite imen pa fatig zot avek Bondye. Bokou i tro okipe avek bann plandaksyon imen ki zot napa letan pour reflesir lo grander Zeova. (Zan 5:44) Me nou, nou konvenki ki i vo lapenn pas letan pour reflesir lo konman pour “fer tou pour laglwar Bondye.” Fer laranzman pour ou prezan e pour byen benefisye avek tou le kat sesyon.