Swiv legzanp ki Zezi in kite
1. Ki legzanp Zezi ti kite?
1 Ler nou partisip dan sa travay pour fer disip, nou devret gard antet ki nou legzanp i kapab annan en gran lefe lo bann dimoun ki pe obzerv nou. Zezi ti ansenny dimoun atraver son parol ek aksyon. Bann ki ti pe obzerv li ti kapab vwar son devouman, son lanmour pour dimoun, son dezir pour sangtifye non son Papa e son determinasyon pour akonplir lavolonte son Papa.—1 Pyer 2:21.
2. Dan ki fason nou legzanp i kapab enfliyans bann ki pe travay avek nou dan predikasyon?
2 Ler pe pres portanport: Zis parey Zezi, nou legzanp i enfliyans bann ki pe travay avek nou dan predikasyon. Ler bann proklanmater pli nouvo e mwen eksperyanse i vwar nou pe partisip dan predikasyon avek devouman, zot pou reflesir lo lafason ki zot akonplir zot predikasyon. Kan zot obzerv nou lazwa ek lentere senser dan lezot, sa pou rapel zot lenportans pour demontre sa bann tel kalite dan zot travay predikasyon. Ler zot vwar nou zefor pour servi Labib, fer bann retourn vizit e kondwir letid Labib, sa pou pous zot pour fer parey.
3. Ki mannyer nou legzanp i kapab enstri bann etidyan Labib e ki zot kapab aprann?
3 Ler pe kondwir letid Labib: Nou bann etidyan Labib pou sirtou obzerv nou kondwit. Par egzanp, menm si nou eksplik zot lenportans pour prepar letid, get bann teks Labib, e souliny bann pwen enportan, zot pou remarke si nou nou’n prepare. (Rom. 2:21) Si nou aler pour fer zot letid, zot pa pou les lezot aktivite enterfer avek zot letid Labib fasilman. San dout zot pou osi remark nou leta lespri sakrifis dan travay predikasyon ek nou lafwa for. I pa etonan alors ki bann ki etidye avek bann proklanmater ki vreman swiv legzanp Zezi i souvan vin bann proklanmater devoue e prodiktif.
4. Ler nou asiste renyon ki nou legzanp i ansenny lezot?
4 Ler nou pe asiste renyon: Tou dimoun ki form parti Kongregasyon i annan en rol pour zwe pour ansenny lezot par zot legzanp dan bann renyon. Bann dimoun ki enterese ki konmans asiste renyon pou benefisye atraver bann bon legzanp ki zot obzerve dan kongregasyon. Zot pou vwar sa lanmitye ek linite ki egziste antre bann frer ek ser e zot fason sanze ki respektab. (Ps. 133:1) Nou legzanp fidel pour asiste renyon e kan nou eksprim nou lafwa an piblik pandan renyon pou osi ganny remarke. Kot enn nou renyon, en viziter ti obzerv en pti fiy ki ti kapab trouv bann verse Labib ki ti pe ganny site dan son prop Labib byen vit e osi lafason ki sa pti fiy ti swiv lektir atantivman. Son legzanp ti pous li pour demann en letid Labib.
5. Akoz nou pa devret zanmen souzestim valer nou legzanp?
5 Labib i ankouraz nou pour imit bon legzanp kanmarad. (Fili. 3:17; Ebr. 13:7) Alors, nou devret mazinen ki si nou swiv legzanp ki Zezi in kite, lezot pou remarke e sa i kapab enfliyans zot dan en fason pozitif. Ler nou realiz sa, fotespere ki nou pran aker sa parol ki trouve dan 1 Timote 4:16: “Vey byen ou lekor e fer byen atansyon avek ou lansennyman.”