En lesanz lankourazman pour nou tou
1. Ki bann loportinite spesyal nou gannyen atraver vizit bann sirveyan rezyonal?
1 Zapot Pol ti ekrir kongregasyon an Ronm e dir zot: “Mon annan en gran dezir war zot pour partaz avek zot bann kado spirityel pour fer zot vin for. An plis, mon ti ava kontan prezan la parmi zot, pour ki nou kapab ansanm benefisye lankourazman: mwan par zot lafwa e zot par mon lafwa.” (Rom. 1:11, 12) Ozordi osi kan bann sirveyan rezyonal i vin vizit nou, nou ganny bann bon loportinite pour fer lesanz lankourazman.
2. Akoz vizit sirveyan rezyonal i ganny anonse byen davans?
2 Kongregasyon: Vizit sirveyan rezyonal i ganny anonse trwa mwan davans. Sa i donn nou ase letan pour fer plan davans pour nou kapab byen benefisye o maksimonm. (Efe. 5:15, 16) Si ou travay, ou kapab demann konze pour kapab partisip dan travay predikasyon pandan sa semenn. Serten i aranze pour fer pionye asistan pandan mwan ki sirveyan i vizite. Si ou pe fer plan pour al vwayaze, eski pa ou kapab fer bann azisteman pour ou prezan sa semenn?
3. Ki nou kapab fer personnelman pour benefisye lankourazman pandan vizit sirveyan?
3 Enn parmi bann bi vizit sirveyan rezyonal se pour donn lankourazman personnel ek lantrennman dan predikasyon. Eski ou kapab fer laranzman pour travay avek li ouswa son madanm, si i’n marye? Sirveyan rezyonal i kontan pour travay avek diferan proklanmater, enkli bann ki annan mwens leksperyans oubyen bann ki anvi aprann plis dan minister. Nou tou nou kapab aprann bokou atraver son prezantasyon dan predikasyon e aplik bann sizesyon ki i ofer nou avek douser. (1 Kor. 4:16, 17) Kan ou envit li pour pran en repa avek ou, sa pou donn plis loportinite pour ankouraz kanmarad. (Ebr. 13:2) Ekout byen atantivman son diskour vi ki i adapte avek bezwen sak kongregasyon.
4. Ki mannyer nou kapab ankouraz nou sirveyan rezyonal?
4 Sirveyan rezyonal: Zapot Pol pa ti diferan avek lezot bann frer ki i ti ede dan kongregasyon, li osi i ti eksperyans bann defi ek lenkyetid e i ti apresye zot lankourazman. (2 Kor. 11:26-28) Kan kongregasyon an Ronm ti tande ki Pol ti pe vini konman en prizonnyen, serten ti vwayaze pour vin ziska Laplas piblik Apiyis pour zwenn li e sa ti en zistans 74 kilomet! “Ler Pol ti war zot i ti remersi Bondye e i ti pran kouraz.” (Akt 28:15) Ou osi ou kapab ankouraz ou sirveyan rezyonal. Montre li “doub loner” par demontre ki nou vreman vreman siport son vizit. (1 Tim. 5:17) Eksprim e demontre ou lapresyasyon senser pour zefor ki i’n fer pour ed ou. Li ek son madanm pour vreman rezwir pandan ki zot obzerv ou lafwa, lanmour ek landirans.—2 Tesa. 1:3, 4.
5. Akoz nou tou nou bezwen lankourazman ozordi?
5 Dan sa bann “letan difisil,” lekel sa dimoun ki pa bezwen lankourazman? (2 Tim. 3:1) Fer zefor depi la konmela menm pour partisip plennman pandan semenn spesyal avek ou sirveyan rezyonal. Ki swa sirveyan rezyonal ouswa proklanmater nou tou nou kapab partisip avek lazwa dan sa lesanz lankourazman. Dan sa fason nou pou kontinyen “ankouraz e fortifye kanmarad.”—1 Tesa. 5:11.