Prese san arete
1 Parfwa nou kapab santi ki dan nou teritwar, travay predikasyon in byen ganny fer pour plizyer fwa me napa bokou bon rezilta. Me kantmenm sa, i annan bann bon rezon ki pous nou pour kontinyen prese.—Mat. 28:19, 20.
2 Pour rann en temwannyaz: Zezi ti predir ki predikasyon lo Rwayonm ti pou en laspe enportan siny ‘konklizyon sa sistenm’ e ki sa ti pou ganny fer “pour tou dimoun konnen.” (Mat. 24:3, 14) Kan dimoun i vwar nou pe partisip dan sa travay predikasyon pour pres sa bon nouvel konsernan sa Rwayonm, sa i rann en temwannyaz pwisan. Apre ki nou’n kit en teritwar, serten dimoun i kapab koz konsernan nou vizit pandan plizyer erdtan oubyen zour, menm si zot pa’n ekout sa mesaz. Kan nou devlop lapresyasyon pour sa bann rezon ki nou annan pour prese, sa i ed nou pour persevere. Nou pe fer plezir Zeova kan nou partisip dan lakonplisman profesi Labib par rann temwannyaz e averti bann dimoun konsernan sa destriksyon ki pe vini byento.—2 Tesa. 1:6-9.
3 Nou bezwen persevere: Lefet ki i annan en kantite keksoz ki preokip e pran bokou letan bann dimoun, alors perseverans i neseser lo nou par kan nou pe fer zefor pour esey devlop lentere en dimoun. En madanm ti ganny en vizit tou le semenn pandan en lannen avan ki i ti deside pour envit bann Temwen kot son lakour pour en diskisyon baze lo Labib. I ti telman kontan sa ki i ti’n tande ki sa ti fer li aksepte en letid Labib, konmans asiste renyon e pa bokou letan apre eksprim son dezir pour batize.
4 Kondisyon sa lemonn pe sanze byen vit e latitid bann dimoun osi pe sanze. Bokou dimoun ki pa ti apresye nou vizit dan lepase i kapab ki aprezan zot pare pour ekout sa mesaz konsernan en lespwar rekonfortan ki nou pe anonse. Menm si zis en dimoun ki byen reazir anver sa mesaz lo Rwayonm, sa pou fer nou perseverans vo lapenn.
5 Atraver lemonn, deplizanpli dimoun pe “zemir e plennyen akoz sa bann move keksoz ki pe arive.” (Ezek. 9:4) Rezilta nou predikasyon i prouve ki sa bann ki annan sa bon kondisyon leker pe reazir anver sa mesaz lo Rwayonm. (Iza. 2:2, 3) Pour sa rezon alors, annou kontinyen prese san arete par persevere avek lanmour pour “anmenn bon nouvel konsernan en keksoz meyer.”—Iza. 52:7; Akt 5:42.