Loue Zeova sak zour
1. Ki bann serviter Bondye i ganny motive pour fer e akoz?
1 Lerwa David ti eksprim son determinasyon pour loue Zeova “tou dilon lazournen,” menm pour en letan endefini. (Ps. 145:2, 7, 21) Nou osi nou annan bon rezon pour loue Zeova sak zour.—Ps. 37:10; 145:14, 18; 2 Pyer 3:13.
2. Ki mannyer bann fanmir i kapab loue Zeova sak zour?
2 Kot lakour: Nou annan bann piblikasyon ki ranforsi lafwa ki kapab ganny servi pour diskit lo bann keksoz spirityel kan nou pe egzamin teks pour lazournen, pandan Letid an fanmir e kan pe prepar pour renyon kongregasyon. Bokou fanmir i fer li en labitid pour zwenn ansanm pour omwen en repa sak zour. Sa i permet ki fanmir i kapab tenir en konversasyon san bezwen prese e i donn loportinite pour loue Zeova. Sa bann diskisyon enformel ki paran i konmans fer i kapab en led enportan pour elve zot zanfan dan “ledikasyon ek lenstriksyon Senyer.”—Efe. 6:4; Det. 6:5-7.
3. Ki loportinite nou annan kan nou avek nou bann frer ek ser?
3 Parmi nou bann frer ek ser: Kan nou dan prediksyon ouswa dan renyon, nou annan bon loportinite pour loue Zeova akote nou bann frer ek ser spirityel. (Prov. 15:30; Fili. 4:8; Ebr. 13:15) Vi ki nou tou nou kontan Zeova, i devret fasil pour eksprim nou lapresyasyon senser pour labonte Zeova kan nou koz avek kanmarad.—Ps. 106:1.
4. Dan ki sirkonstans spesyal nou kapab loue Zeova?
4 Kan pe koz avek bann non krwayan: Menm si sirkonstans pa permet nou partisip dan prediksyon tou le zour, koz an bref avek koleg travay, kanmarad lekol ek lezot ki otour nou lo Zeova ek son plan, i kapab donn lespwar en dimoun ki annan leker senser. (Ps. 27:14; 1 Pyer 3:15) Kan i ti pe vwayaze lo avyon, en ser ti pres avek en lot pasaze. Sa pasaze ti santi li rekonforte e ankouraze par sa ki i ti tande ki i ti donn sa ser son ladres ek nimero telefonn pour ki zot kapab gard kontak avek kanmarad. Anmezir ki limanite i soufer avek problenm ki agrave ek bann kondisyon lemonn ki vin pli pir, pep Zeova i kontinyen anmenn “bon nouvel konsernan en keksoz meyer” kot bann ki pare pour ekoute. Sa i donn zot en lespwar e en rezon pour loue Zeova.—Iza. 52:7; Rom. 15:11.
5. Akoz i nou dezir pour loue Zeova e ki sa i kapab akonplir?
5 Pa i vreman en plezir pour Zeova tann son bann serviter loue li sak zour! Parey i leka avek bann kreasyon Zeova ki otour nou, nou osi nou kapab fer sorti bann parol pour loue li sak zour kot nou lakour, dan kongregasyon e kan nou koz avek lezot ki ziska aprezan pa ankor vin en adorater Zeova ki loue li.—Ps. 19:1-4.