Zeova i vreman merite ganny loue
Repa Senyer pou ganny komemore le 16 Avril
1 Leksitasyon i ogmante anmezir ki nou apros le 16 Avril, 2003. Sa zour swar, nou pou komemor lanmor Zezi ansanm avek plizyer milyon adorater partou dan lemonn pour glorifye non Zeova. Zeova i merit tou nou louanz pour sa ranson ki i’n fourni konman en kado merveye. Par sa mwayen, i pou devers lo tou imen obeisan bann benediksyon merveye. Avek tou nou leker nou zwenn ansanm avek sa psalmis pour kriye: “Zeova i gran e vreman merite ganny loue.”—Ps. 145:3.
2 Sa i en letan pour medit lo labonte Bondye e sa det rekonesans ki nou drwa Zeova pour anvoy “son sel Garson dan lemonn pour ki par li nou ganny lavi.” (1 Zan 4:9, 10) Kan nou obzerv Repa Senyer avek lobeisans sa i grav dan nou leker ki “Zeova i konpasyon e mizerikord . . . e gran an labonte leker.” (Ps. 145:8) Anfet, sa ranson i pli gran lekspresyon lanmour Zeova anver limanite. (Zan 3:16) Kan nou reflesir lo lanmour Bondye e konsider fidelite Zezi, nou santi nou pouse pour loue Zeova. Pour leternite, nou pou loue li pour son lanmour san limit ki i’n demontre pour fer lavi eternel posib pour nou.—Ps. 145:1, 2.
3 Ed Lezot pour loue Zeova: Lapresyasyon pour sa ranson, kado ekselan ki Bondye in fourni, i motiv nou pour envit lezot pour zwenn ansanm avek nou pour loue Zeova. Sa psalmis ti ganny enspire pour ekrir: “Zot labous pou deborde avek bann lekspresyon louanz kan zot pou tann koz lo labondans ou labonte, e zot pou kriye avek lazwa akoz ou ladrwatir.” (Ps. 145:7) Zis lannen pase, bann Temwen Zeova partou dan lemonn ti depans plis ki en bilyon er-d-tan dan travay predikasyon. Ki rezilta ki zot ti gannyen pour zot zefor? Sak semenn, en mwayenn plis ki 5,100 dimoun ti batize pour senboliz zot dedikasyon avek Zeova. Avek en total 15,597,746 ki ti asiste Memoryal, ladan i annan plis ki 9 milyon ki pa ankor konmans loue Zeova konman bann proklanmater sa bon nouvel, i annan en gran potansyel pour plis ogmantasyon! Konman bann proklanmater Rwayonm, nou seri nou privilez pour anons bon nouvel e diriz leker lezot ver Zeova, son Garson, ek sa Rwayonm.
4 En bon fason pour ankouraz lezot pour onor Zeova se par envit zot pour zwenn ansanm avek nou pour komemor Repa Senyer. Eski ou’n fer en lalis tou dimoun ki ou anvi envite osi byen lezot ki petet ou bezwen rapel zot zour ek ler sa levennman enportan? Eski ou’n ofer en lenvitasyon tou bann ki lo ou lalis? Si non, fer en zefor pour anvoy en lenvitasyon pour zot dan letan ki reste. Ed zot pour konpran bi sa selebrasyon. Zour memoryal, met ou pare pour akeyir bann viziter. Fer zot santi alez, entrodwir zot avek lezot, e felisit zot pour vin asiste.
5 Asiste Memoryal i kapab motiv bann nouvo pour fer progre spirityel. En etidyan Labib ki ganny lafreyer kan i dan en gran lafoul dimoun, ki fer li difisil pour al an piblik, ti asiste Memoryal. Ler i ti ganny demande ki i panse lo sa renyon, i ti dir: “I ti en lannwit vreman sen, e mon ti la.” Depi sa, i’n konmans asiste bann renyon.
6 Apre Memoryal: Kwa ki kapab ganny fer pour ed sa bann nouvo ki enterese pour loue Zeova? Bann ansyen pou not byen bann nouvo ki asiste Memoryal e fer laranzman pour ki bann proklanmater kalifye i vizit zot toudswit apre pour reviz bann keksoz enteresan ki zot in aprann e obzerve. Serten i kapab annan sa dezir pour etidye Labib. Zot devret osi ganny envite pour asiste tou bann renyon kongregasyon, vi ki asiste regilyerman i kapab ogmant zot konnesans Labib.
7 Bann laranzman pe ganny fer pour ankouraz tou bann iregilye ek inaktif pour asiste renyon regilyerman. Si ou ganny demande par bann ansyen pour ed en dimoun ki’n vin inaktif pour rekonmans partisip ankor dan predikasyon, pare pour reponn sa demann. Montre en tel konsern ranpli avek lanmour pour nou bann frer i an armoni avek konsey zapot Pol: “Pandan ki nou annan lokazyon, annou fer dibyen tou dimoun, sirtou nou bann frer dan lafwa.”—Gal. 6:10.
8 Fotespere nou tou nou fer en zefor spesyal pour asiste Memoryal le 16 Avril. Nou pa pou anvi mank sa lokazyon sakre pour loue Zeova. Wi, la konmela e pour touzour, annou loue Zeova pour son bann gran travay!—Ps. 145:21.